31.08.2026 | 23:00
Երևանում տեղադրվել է COP17-ի մեկնարկի հետհաշվարկի խորհրդանիշը
Ալեքսան Պետրոսյանի խափանման միջոց կալանքը փոխելու վերաբերյալ Դատախազություն միջնորդություն ենք ներկայացրել․ փաստաբան
Հասարակություն
24.12.2019 | 17:23
ԱԺ նախկին պատգամավոր, Մապի Ալիկ անունով հայտնի Ալեքսան Պետրոսյանի վերաբերյալ քրեական գործով նախաքննության ավարտ է հայտարարվել:
Տեղեկությունը Factor.am-ի հետ զրույցում հաստատեց փաստաբան Միհրան Պողոսյանը։ Փաստաբանը տեղեկացրեց, որ իրենք Գլխավոր դատախազ Արթուր Դավթյանին Ալիկ Պետրոսյանի խափանման միջոց կալանքը փոխելու վերաբերյալ միջնորդություն են ներկայացրել։
«Միջնորդություն ենք ներկայացրել գլխավոր դատախազին՝ խնդրելով վեր կանգնել ներիրավական անդրկուլիսային պայքարներից, ինչ-որ այլ նպատակներից և օրենքով սահմանված որոշում կայացնել։ Թեկուզ եթե մեղադրական եզրակացությունը հաստատվի, ապա խափանման միջոցը վերացնել, քանի որ Ալեքսան Պետրոսյանին կալանքի տակ պահելու միակ հիմքը հանդիսացել է նախաքննության ժամանակ գործով ճշմարտության բացահայտման վրա ազդեցություն ունենալու վտանգը։ Մենք հիմնավորել ենք և ներկայացրել ենք, որ նախաքննությունն ավարտվել է, գործով ճշմարտությունն արդեն իսկ, ըստ քննիչի, բացահայտվել է, և այժմ հիմք չկա կալանքի տակ պահելու»,- ասաց փաստաբանը։
Հիշեցնենք, որ Ալեքսան Պետրոսյանը մեղադրվում է փողերի լվացմանն օժանդակելու համար:
