08.12.2025 | 13:43
Անչափահասները ծեծել են 38-ամյա տղամարդուն․ նա ծնոտի կոտրվածք է ստացել
Արցախի թիմի մասնակցության փաստի հետ կապված Վրաստանի ներկայացուցչի վրա ճնշումներ են եղել․ Վահրամ Դումանյանը մանրամասներ է ներկայացնում
Քաղաքականություն
02.12.2019 | 19:31
Հայաստանն արդեն 20 տարի է՝ մասնակցում է Միջազգային ուսանողական ծրագրավորման մրցույթին (ICPC): Վերջերս Հայաստանում կայացել է քառորդ եզրափակիչ փուլը, որին այս տարի առաջին անգամ լավ մասնակցություն է ցուցաբերել նաև Արցախի թիմը։ Թիմը պաշտոնապես գրանցվել է և Վրաստանում կիսաեզրափակչին մասնակցելու պաշտոնական հրավեր ստացել, սակայն ինչ-ինչ պատճառներով երեկ կայացած կիսաեզրափակիչին Արցախի պետական համալսարանի մասնակցությանը դեմ են եղել Վրաստանի ներկայացուցիչները։
Factor.am-ի հետ զրույցում հայկական թիմերի կազմակերպիչ Վահրամ Դումանյանը տեղեկացրեց, որ ICPC-ի «Հյուսիսային Եվրասիայի տարածաշրջանային մրցույթներ 2019»-ը անցկացվում է նախկին ԽՍՀՄ-ի 4 քաղաքներում՝ Սանկտ Պետերբուրգում, Թբիլիսիում, Ալմաթիում և Բառնաուլում: Թբիլիսիում հիմնականում Հայաստանի, Վրաստանի, Ադրբեջանի և Ուկրաինայի թիմերն են մասնակցում:
Նա նկատեց, որ Արցախի համալսարանը պաշտոնական հրավերը ստացել է հենց Թբիլիսիի Բիզնեսի և տեխնոլոգիաների համալսարանի (BTU) մեխանիկայի և մաթեմատիկայի ֆակուլտետի, ինֆորմատիկայի ինժեներական աստիճան ունեցող պրոֆեսոր, ծրագրավորման աջակցության ասոցիացիայի հիմնադիր Թեմուր Զարքուայի կողմից և գնացել է Վրաստան։
«Սակայն դեկտեմբերի 30-ին հեռախոսազանգ եղավ, որ Զարքուան ցանկանում է ինձ հետ խոսել, քանի որ ինչ-որ խնդիր կա։ Նա ասաց, որ Արցախի թիմի մասնակցության փաստի հետ կապված իր վրա ճնշումներ կան։ Ես նրան ասացի, որ Արցախի համալսարանն, ինչպես մեր մյուս հայկական թիմերը, պետք է մասնակցի մրցույթին։ Իսկ ճնշումները, պարզ է, որ Ադրբեջանի կողմից են»,- նշեց Վահրամ Դումանյանը։
Հաջորդ օրը՝ դեկտեմբերի 1-ին, կիսաեզրափակիչ մրցույթի ժամանակ Թեմուր Զարքուան Արցախի թիմի անդամներին դահլիճից դուրս է հանում։
Ինչպես փոխանցեց Դումանյանը, ինքը նրան տեղյակ է պահել, որ անձնական պատասխանատվություն է կրելու և անօրինական քայլ է արել։
«Ես ապշած եմ, թե նա ինչքան վախեցած էր և մինչև վերջ չբացահայտվեց, թե ինչից։ Հետո եկավ, թե թիմի անունը պետք է ցուցակից հանվի, բայց նա դրա իրավունքը չուներ։ Ես կապվեցի Սանկտ Պետերբուրգի գլխավոր ղեկավարի հետ, նա անձամբ ներողություն խնդրեց և նշեց, որ դա անօրինականություն է, ինքն իրավունք չունի նման բան անելու, բայց այս պահին իրենք չեն կարող կանխել, քանի որ լծակ չունենք»,- մանրամասներ ներկայացրեց մեր զրուցակիցը՝ ընդգծելով, որ Սանկտ Պետերբուրգի ղեկավարն անձամբ խոստացել է, որ մյուս տարի Արցախի պետական համալսարանի թիմը կհրավիրվի իրենց կողմից Պետերբուրգ՝ մրցույթին մասնակցելու:
