14.09.2026 | 20:30
Ադրբեջանը սարքել է եվրոպացի դիվանագետների գլխին՝ մասնակից դարձնելով իր կազմակերպած շոուին․ Էդգար Առաքելյան. ՏԵՍԱՆՅՈՒԹ
ՀԲ-ն Հայաստանին 50 մլն դոլար նոր վարկ կտրամադրի բարեփոխումների կայունության նպատակով
Տնտեսություն
22.11.2019 | 17:18
Համաշխարհային բանկի գործադիր տնօրենների խորհրդի որոշմամբ՝ 45.8 միլիոն եվրո (50 միլիոն ԱՄՆ դոլար) գումարի չափով նոր վարկ կտրամադրվի «Հայաստանի կառավարմանն ուղղված զարգացման քաղաքականության գործառնություն» (DPO) բյուջետային աջակցության ծրագրի համար: Այն հաստատուն սփրեդով ՎԶՄԲ վարկ է՝ 14.5 տարի արտոնյալ և 25.5 տարի մարման ընդհանուր ժամկետով:
Ծրագիրն ուղղված է աջակցելու ՀՀ կառավարության՝ տնտեսական, հարկաբյուջետային և հանրային հատվածի արդյունավետ կառավարմանը:
«Նոր վարկավորումը հաջորդում է թույլ կառավարման և կոռուպցիայի դեմ 2018 թ. անցկացված համատարած բողոքի ակցիաներին, որոնց գագաթնակետը խաղաղ և պատմական «թավշյա» հեղափոխությունն էր: Նորընտիր կառավարությունը, զինված փոփոխության իրականացման հզոր մանդատով, առաջադրեց հնգամյա բարեփոխումների հավակնոտ ծրագիր, որի նպատակն է մրցակցության բարելավումը և տնտեսական աճի խթանումը՝ միաժամանակ բավարարելով ժողովրդի՝ լավ կառավարման, թափանցիկության բարձրացման, հաշվետվողականության և արդյունավետ հանրային ծառայությունների պահանջները»,- նշված է ՀԲ-ի հաղորդագրության մեջ:
Համաշխարհային բանկի հայաստանյան գրասենյակի ղեկավար Սիլվի Բոսութղոնի խոսքով՝ այս գործառնությամբ սահմանվում է կառավարման առանցքային բարեփոխումների, սկզբնական քայլերի առաջնահերթությունը, որոնք մի շարք ոլորտներում հիմք են ստեղծում երկարաժամկետ բարեփոխումների համար: «Այն խարսխված է ՀՀ կառավարության 2019–2023 թթ. ծրագրի և ՀԲ-ի 2019-2023 թթ. երկրի հետ գործընկերության շրջանակի վրա, որն ընդգծում է կառավարումը որպես փոխհատվող հենք: Դրա առանցքում բարձր ռազմավարական նշանակությամբ, ազդեցությամբ և բարեփոխումների կայունությամբ ոլորտներն են, որտեղ այն կարող է օժանդակել ավելի խորը փոփոխությունների կառուցվածքային տարրերին»:
Միջոցներ կտրամադրվեն հարկային վարչարարության բարելավման, հանրային ներդրումների կառավարման ավելի ամբողջական համակարգի ստեղծման, հակակոռուպցիոն միջոցառումների փաթեթի աջակցման, արդարադատության ոլորտի և քաղաքացիական ծառայության կատարողականի կատարելագործման եւ այլ նպատակներով:
Նշենք, որ 1992 թ. Համաշխարհային բանկին և 1993 թ. ՄԶԸ-ին անդամակցելուց ի վեր Հայաստանի նկատմամբ հանձնառությունների ընդհանուր գումարը կազմել է մոտ 2 մլրդ 429 մլն 734 հազար ԱՄՆ դոլար:
Մ․ Ս․
