Երբ Սերժ Սարգսյանը Վազգեն Մանուկյանին «իդիոտ» անվանեց, նա շարունակեց համագործակցել. Արման Բաբաջանյան. ՏԵՍԱՆՅՈՒԹ

Գոյություն չունեցող միավորին հնարավոր չէ ճնշել: Խորհրդարանում լրագրողների հետ զրույցում նման կարծիք հայտնեց ԱԺ պատգամավոր Արման Բաբաջանյանը՝ անդրադառնալով դիտարկմանը, որ Հանրային խորհրդի նախագահ Վազգեն Մանուկյանը, ըստ էության, հրաժարական ներկայացրեց Բաբաջանյանի դիմումից հետո, և Խորհրդում սա ճնշում են համարում:

«Հանրային խորհուրդն իր ստեղծման օրից՝ 2008 թվականին հայտնի իրադարձություններից հետո ստեղծվելուց ի վեր, կարծում եմ, երբեք չի առանձնացել հանրային կյանքում առանձնահատուկ գործունեությամբ: Ես հույս ունեմ, որ հետայսու մենք իսկապես կվերաիմաստավորենք Հանրային խորհրդի դերն ու նշանակությունը: Եվ եթե մենք այդ սահմանադրական մարմինը շարունակելու ենք կարևորել, ուրեմն պետք է կարևորենք նաև, թե ինչ ենք ակնկալում այդ մարմնից և ինչպիսի հաղորդակցության խողովակներ ենք պատկերացնում այդ մարմնի հետ: Պետք է քաղաքական չեզոքության ամենակարևոր սկզբունքը դնենք մեր առաջ՝ որպես այդ մարմնի արդյունավետ գործունեության կարևոր նախապայման»,- ասաց պատգամավորը:

Հարցին, թե Վազգեն Մանուկյանն ակնարկում է, որ առանց Նիկոլ Փաշինյանի հետ համաձայնության ինքը նման նախաձեռնությամբ հանդես չէր գա, համաձայնեցվե՞լ է այդ նախաձեռնությունը վարչապետի հետ, Արման Բաբաջանյանը պատասխանեց. «Ես հասկանում եմ Վազգեն Մանուկյանի ապրումները, վերջին շրջանի զգացողությունները, բայց պիտի հավաստիացնեմ, որ ոչ մի առնչություն, ոչ մի համաձայնություն չի եղել վարչապետի հետ: Ես նրա հետ նույնիսկ չեմ հանդիպել այս ամբողջ ժամանակահատվածում, չեմ առնչվել»:

Պատգամավորի խոսքով՝ Վազգեն Մանուկյանի գործունեության առնվազն վերջին 20 տարիները եղել են Ռոբերտ Քոչարյանի և Սերժ Սարգսյանի հետ պայմանավորվածությունների, համաձայնությունների տիրույթում:

«Նույնիսկ այն ժամանակ, երբ Սերժ Սարգսյանը նրան «իդիոտ» էր անվանում, ինքը չխորշեց գնալ և նրա հետ շարունակել քաղաքական տանդեմի շրջանակում գործունեություն ծավալել և ընդունել առաջարկը՝ Հանրային խորհրդի նախագահի պաշտոնը զբաղեցնելու մասով»,- ասաց նա:

Մանրամասները՝ տեսանյութում: