Զանգվածային ձերբակալություններ Ադրբեջանում. ընդդիմության բողոքի ակցիան կասեցվել է

Ադրբեջանի ոստիկանությունը նախօրեին Բաքվի կենտրոնում ընդդիմադիր «Մուսավաթ» կուսակցության կողմից կազմակերպված ցույցը կասեցրել է: Ակցիայի բազմաթիվ մասնակից ձերբակալվել են:

Ակցիան, որը «Մուսավաթ»-ը նախատեսում էր անցկացնել նոյեմբեմբերի 12-ին կառավարության շենքի մոտ, այդպես էլ չի կայացել: Այդ տարածքում, ինչպես նաև «Մուսավաթ» կուսակցության կենտրոնական գրասենյակի մոտ իշխանությունները նախապես ոստիկանական մեծաթիվ ուժեր են կենտրոնացրել:

Ադրբեջանական լրատվամիջոցների փոխանցմամբ՝ մետրոյի «Իչերի շեհեր» կայարանի մոտ ոստիկանները ձերբակալել են «Մուսավաթ» կուսակցության ղեկավարի տեղակալներ Սախավատ Սոլթանլիին, Ֆարաջ Քերիմլիին, կուսակցության Սաբաիլի մասնաճյուղի ղեկավար Զաքիր Իսմայիլին և այլ ակտիվիստների։ «Մուսավաթի» գրասենյակի մոտ ձերբակալվել է նաև  կուսակցության առաջնորդ Արիֆ Հաջիլին։

Նշենք, որ ոստիկաններն ու քաղաքացիական հագուստով ուժայինները լրագրողներին խանգարել են աշխատել ու ֆիքսել կատարվող իրադարձությունները։

Ընդհանուր առմամբ, ինչպես լրատվամիջոցներին հայտնել է «Մուսվաթ»-ի ապարատի ղեկավար Գյուլաղա Ասլանլին, ձերբակալվել է 40 մարդ, 12-ն էլ ձերբակալվել են նախքան ակցիայի մեկնարկը։ Միայն Սաբայիլի ոստիկանության շրջանային բաժանմունք բերման է ենթարկվել ակցիայի 19 մասնակից , նրանցից զատ ձերբակալվել են ևս 10-ը։ «Մուսավաթ» կուսակցության փոխնախագահ Ռազիմ Ամիրասլանլին ձերբակալվել է 15 օրով ոստիկաններին դիմադրություն ցույց տալու մեղադրանքով։

Նշենք, որ ընդդիմադիրների նկատմամբ ճնշումներն իշխանությունները  սկսել էին ավելի վաղ։ Ծրագրված ցույցի առիթով «Մուսավաթի» ավելի քան 100 անդամ հրավիրվել էր ոստիկանության բաժանմունք, որտեղ նրանց փորձել են ստիպել հրաժարվել ցույցի անցկացումից։

«Հարցեր են տրվել ծրագրված ցույցի վերաբերյալ և մասնակցության դեպքում սպառնացել կալանքով»,- BBC հետ զրույցում ասել է «Մուսավաթ»-ի մամուլի քարտուղար Մուսթաֆա Հաջիբեյլին:

Հիշեցնենք, որ Ադրբեջանի իշխանությունները ցույցը չէին արտոնել։ Իսկ ընդդիմադիրների այս հավաքը նվիրված էր հավաքների ազատությանը։ Իշխանություններն ընդդիմադիր ուժերին կտրականապես թույլ չեն տալիս հանրահավաքներ անցկացնել Բաքվի կենտրոնում, դրանք առաջարկում են անցկացնել մայրաքաղաքից 20 կմ հեռավորությամբ գտնվող Լոքբատան ավանում։ Այդ պատճառով էլ ընդդիմությունը պարբերաբար փորձում է հանրահավաքներ անցկացնել Բաքվի կենտրոնում, որոնք ամեն անգամ կասեցվում են ոստիկանների կողմից։

Ի դեպ՝ հոկտեմբերի 19-ին ընդդիմադիր «Դեմոկրատական ուժերի ազգային խորհուրդն» էր հանրահավաք անցկացրել, որը ոստիկանները, անհամաչափ ուժ կիրառելով, ցրել էին։ Ձերբակալվել էր 100 մարդ, այդ թվում՝ ընդդիմադիրների առաջնորդ Ալի Քերիմլին։ Հանրահավաքի ընթաքցում անջատվել էր ինտերնետ կապը, փակվել էին մետրոյի կայարանները։

Էմմա Չոբանյան