04.04.2026 | 15:41
ՀՀ ՄԻՊ-ը ծանոթացել է ազատությունից զրկված անձանց պահման պայմաններին՝ «Վարդաշեն» ՔԿՀ-ում
Բոլիվիայի նախագահը հրաժարական է տվել. նա երկրում տեղի ունեցածը պետական հեղաշրջում է որակել
Քաղաքականություն
11.11.2019 | 12:18
Բոլիվիայի նախագահ Էվո Մորալեսը հրաժարական է ներկայացրել: Նրան հետևել են երկրի փոխնախագահ Ալվարո Գարսիա Լիներան, Սենատի ղեկավար Ադրիանա Սալնատյերան, Սենատի առաջին փոխխոսնակ Վիկտոր Բորդան, գրում է ՏԱՍՍ-ը:
«Հրաժարական ենք ներկայացնում, որպեսզի մեր եղբայրներն ու քույրերը, պետական ծառայողները հարձակումների և սպառնալիքների չենթարկվեն»,- սոցցանցերում հեռարձակված ուղերձում ասել է Մորալեսը:
Նա ընդդիմությանը մեղադրել է պետական հեղաշրջման փորձի համար և հույս հայտնել, որ իր հեռանալուց հետո հակառակորդները «կդադարեն այրել շարքային քաղաքացիների տները»: «Քույրեր և եղբայրներ, ուզում եմ ձեզ ասել, որ մեր պայքարը չի ավարտվում, մենք շարունակելու ենք պայքարել հանուն հավասարության և խաղաղության: Հիմա իմ պարտականությունը իրավիճակը հանդարտեցնելու միջոց գտնելն է»,- ասել է նա:
Նշենք, որ Էվո Մորալեսը պաշտոնից հեռանալու որոշում է կայացրել երկրի բանակի պահանջով: Բանակի հրամանատար Ուիլյամս Կալիմանը հայտարարել է, որ նախագահը պետք է հեռանա՝ հանուն երկրի ապագայի:
Մեքսիկան Բոլիվիայում տեղի ունեցող իրադարձությունները «ռազմական գործողություն» է որակել, իսկ արդեն նախկին նախագահ Էվո Մորալեսին ապաստան է առաջարկել: Վերջինը, սակայն, հայտարարել է, որ չի պատրաստվում հեռանալ երկրից:
«Ես չեմ հեռանա Բոլիվիայից: Ես փախչելու պատճառ չունեմ»,- հայտարարել է նա:
Բոլիվիայում ճգնաժամը սկսվել է նախագահական ընտրություններից հետո, որոնց արդյունքում Մորալեսը հաղթել է: Ընդդիմությունը, սակայն, կարծում է, որ քվեարկության ժամանակ կոպիտ խախտումներ են թույլ տրվել: Արդյունքում բողոքի ակցիաներ են սկսվել, որոնց ընթացքում ոստիկանության բազմաթիվ աշխատակիցներ ընդդիմության կողմն են անցել:
Ընտրություններում խախտումների մասին նշել են նաև Ամերիկյան պետությունների կազմակերպության դիտորդները, ինչից հետո Մորալեսը հայտնել է, որ համաձայն է նոր ընտրություններ անցկացնել և ընդունել ԿԸՀ ղեկավարության հրաժարականը: Ընդդիմությունը, սակայն, պահանջել է, որպեսզի երկրի ղեկավարը հրաժարական տա և չմասնակվի նոր ընտրարշավին:
Էվո Մորալեսն առաջին անգամ Բոլիվիայի նախագահ է ընտրվել 2006 թվականին, այնուհետև երկու անգամ վերընտրվել է այդ պաշտոնում:
