08.12.2025 | 23:30
Իլոն Մասկը կոչ է անում «վերացնել» ԵՄ-ն. Եվրահանձնաժողովին արգելվել է X-ում գովազդներ տեղադրել՝ 120 միլիոն եվրո տուգանքից հետո
Թուրք զինվորականները Հասակեում սիրիացի ցուցարարների դեմ արցունքաբեր գազ են կիրառել
Քաղաքականություն
08.11.2019 | 19:52
Թուրքական բանակի զինծառայողները Հասակե նահանգի հյուսիսային Ջավադիա շրջանում բողոքի ակցիայի ժամանակ արցունքաբեր գազով նռնակներ են կիրառել սիրիացիների դեմ: Այս մասին գրում է ՏԱՍՍ-ը՝ վկայակոչելով ՍԱՆԱ գործակալությունը:
Աղբյուրի փոխանցմամբ՝ Դեյր Հոսն բնակավայրից ցուցարարները հավաքվել են այն մայրուղում, որտեղով պետք է անցներ զրահատեխնիկայի շարասյունը, և կարգախոսներ վանկարկել՝ Թուրքիայից պահանջելով զորքերը դուրս բերել սիրիական տարածքից:
Ակցիայի մասնակիցները նաև քարեր և կոշիկներ են նետել թուրք զինվորականների ուղղությամբ: Ցուցարարներին ցրելու համար արցունքաբեր գազ է կիրառվել:
Հիշեցնենք, որ հոկտեմբերի 9-ից մեկնարկած «Խաղաղության ակունք» անդրսահմանային գործողության ընթացքում Թուրքիան Սիրիայի հյուսիսում 32 կմ խորությամբ անվտանգության գոտի է ստեղծել: Դամասկոսում թուրքական զորքերի ներխուժումն ագրեսիա են որակել և հոկտեմբերի 14-ին բանակային ստորաբաժանումներ ուղարկել քրդական կազմավորումների վերահսկողության տակ գտնվող Հասակե նահանգ:
Հոկտեմբերի 22-ին Ռուսաստանի և Թուրքիայի նախագահները Սոչիում հանդիպման արդյունքներով Սիրիայի հյուսիս-արևելքում իրադրության կարգավորմանն ուղղված համատեղ գործողությունների մասին հուշագիր են ստորագրել: Նոյեմբերի 1-ից ռուս և թուրք զինծառայողները Եփրատ գետից դեպի արևելք համատեղ պարեկություն են սկսել:
ՍԱՆԱ-ի փոխանցմամբ՝ սահմանամերձ շրջանների բնակիչները թշնամաբար են վերաբերվում թուրքական զորքերին և նրանց կողմից պատերազմող զինված ընդդիմությանը: Հասակե և Ղամըշլի քաղաքներում բողոքի ակցիաներ են անցկացվել, որոնց մասնակիցները ողջունել են երկրի հյուսիս-արևելքում սիրիական բանակի տեղակայումը:
