ՆԱՏՕ-ի զորավարժություններին մասնակցությունը չի հակասում հայ-ռուսական զորախմբի համաձայնագրին. ՊՆ

ՆԱՏՕ-ի զորավարժություններին մասնակցությունը չի հակասում հայ-ռուսական Միավորված զորախմբի մասին համաձայնագրին: Այս մասին ի պատասխան մեր գրավոր հարցմանը՝ հայտնել են ՀՀ պաշտպանության նախարարությունից:

Գրավոր հարցմամբ նախարարությունից խնդրել էինք պարզաբանել՝ իրականում ՆԱՏՕ-ի զորավարժություններին մասնակցելը հակասո՞ւմ է հայ-ռուսական Միավորված զորախմբի մասին համաձայնագրին, թե՞ ոչ:

Հիշեցնենք՝ ավելի քան մեկ ամիս առաջ Վրաստանում անցկացվեցին Agile Spirit 2017 զորավարժությունները: Ենթադրվում էր, որ Հայաստանից այդ զորավարժություններին երեք ռազմական բժիշկ պետք է մասնակցեին, սակայն, ինչպես հայտնել էր Վրաստանի պաշտպանության նախարարությունը, Հայաստանը վերջին պահին հրաժարվել էր մասնակցել զորավարժություններին:

Հայաստանի պաշտպանության նախարարությունը, իհարկե, հերքեց վրացական կողմի պնդումները՝ նշելով. «Զորավարժությունների մասնակցությունից վերջին պահին հրաժարվելու վերաբերյալ շրջանառվող շահարկումներն անտեղի են»: Այդ օրերին հարցի առնչությամբ Factor.am-ի հետ զրույցում ուշագրավ հայտարարություն էր արել ոուս քաղաքական վերլուծաբան Մոդեստ Կոլերովը, մասնավորապես շեշտելով, թե ՆԱՏՕ-ի զորավարժություններին մասնակցությունը հակասում է վերջերս ստեղծված հայ-ռուսական Միացյալ զորախմբի մասին համաձայնագրին և երկկողմ պաշտպանական ջանքերին:

Նշենք, որ երեկ՝ հոկտեմբերի 5-ին, խորհրդարանը 87 կողմ և 7 դեմ ձայների հարաբերակցությամբ վավերացրեց հայ-ռուսական համատեղ զորախումբ ստեղծելու մասին համաձայնագիրը: Այդ համաձայնագրին դեմ քվեարկեցին միայն ընդդիմադիր «Ելք» խմբակցության պատգամավորները։

Պաշտպանության նախարարությունից նաև հետաքրքրվել էինք՝ արդյոք Հայաստանը պատրաստվում է վերանայել ՆԱՏՕ-ի հետ համագործակցությունը՝ այն հասցնելով նվազագույնի: Նախարարությունից հակիրճ պատասխանել էին, որ նման մտադրություն չունեն:

Շողիկ Գալստյան