«Մեզ մեղադրում էին կուլիսային քննարկումների մեջ, հիմա նույնը իրենք են անում». ԵՊՀ ՈւԽ նախագահ. ՏԵՍԱՆՅՈՒԹ

«Մեծ հաշվով, սա ոչ թե միտված է կրթության բարելավմանը, այլ բուհերն իրենց հնազանդեցնելուն»,- այս մասին այսօր լրագրողների հետ զրույցում նշեց Երևանի պետական համալսարանի ուսանողական խորհրդի նախագահ Դավիթ Ափոյանը։

Նշենք, որ ԵՊՀ հայ բանասիրության ֆակուլտետի ուսանողներն ընդդեմ հայոց լեզու, հայոց պատմություն և հայ գրականություն առարկաները ոչ պարտադիր դարձնելու մասին որոշման նախագծի դասադուլ են հայտարարել:

«Այս հարցում շատ կարևոր է ուսանողների կարծիքը։ Մեր դիրքորոշումը հետևյալն է․ եթե խնդրին նայենք այն տեսանկյունից, որը ներկայացնում են Կրթության մասին օրենքի հեղինակները, թե վեց տարի դպրոցում հայոց պատմություն ենք անցնում, գալիս ենք համալսարանում ևս մեկ տարի ենք անցնում, և դրա փոխարեն ուսումնական ծրագրում կարող են ներառել մանսագիտական առարկաներ, այդ տեսանկյունից, գուցե արդարացված է։ Բայց մյուս կողմից այդպես չէ․ հայոց պատմություն առարկան շատ կարևոր է։ Եթե ուզում են ավելացնել մասնագիտական բաղադրիչները, կարծում եմ, կարելի է կրճատել և այդ առարկաների դասավանդումը դարձնել մեկ կիսամյակ, ոչ թե ամբողջությամբ հանել»,- ասաց ԵՊՀ ՈւԽ նախագահը։

Անդրադառնալով ԿԳՄՍ աշխատանքին, Դավիթ Ափոյանը նշեց․ «Շատ դժգոհ եմ այն վերաբերմունքից, որն Արայիկ Հարությունյանը կրթության նկատմամբ ունի։ Կրթությունն ամենաթողության է մատնված, չեմ կարծում, որ մայր բուհը ԿԳՄՍՆ-ի ուշադրության կենտրոնում է։ Ուշադրություն չի դարձվում ներքին կարգուկանոնին։ Եթե նախկինում բուհին մեղադրում էր կուլիսային խոսակցությունների մեջ, այսօր հենց նախարարի հովանավորչությամբ այդ կուլիսային խոսակցություններն ավելի մեծ են, և դրանց վերջ պետք է դրվի։ Կրթությունը, եթե ոչ մեծ տեմպերով հետընթաց, ապա առաջընթաց չի գրանցում»։

Մանրամասները՝ տեսանյութում։

Նելլի Մելքոնյան