09.12.2025 | 16:52
Հայաստանի առաջնության ամենաթանկ ֆուտբոլիստները՝ ըստ Transfermarkt-ի
ԵՄ անդամ երկրները համաձայնել են հետաձգել Brexit-ը. Տուսկ
Քաղաքականություն
28.10.2019 | 15:30
ԵՄ անդամ 27 երկրները որոշել են չմերժել Մեծ Բրիտանիայի դիմումը՝ Brexit-ը ևս երեք ամսով՝ մինչև 2020 թվականի հունվարի 31-ը երկարաձգելու մասին: ՏԱՍՍ-ի փոխանցմամբ՝ այս մասին Բրյուսելում հայտարարել է Եվրոպական խորհրդի ղեկավար Դոնալդ Տուսկը:
Նրա խոսքով՝ «որոշումը պաշտոնապես կձևակերպվի գրավոր ընթացակարգով»:
Նշենք, որ Մեծ Բրիտանիան պետք է ԵՄ-ից դուրս գար 2019 թվականի մարտի 29-ին՝ կառույցից դուրս գալու մասին գրավոր դիմում ներկայացնելուց երկու տարի անց: Սակայն բրիտանական խորհրդարանի Համայնքների պալատը երեք անգամ մերժեց Brexit-ի պայմանների մասին համաձայնագրի նախագիծը, որի շուրջ համաձայնություն էր ձեռք բերվել Բրյուսելի և վարչապետ Թերեզա Մեյի կառավարության միջև:
Արդյունքում ԵՄ-ն համաձայնեց Brexit-ը հետաձգել նախ մինչև ապրիլ կամ մայիս, հետո՝ մինչև հոկտեմբերի 31-ը, իսկ Մեյը ստիպված եղավ հրաժարական տալ՝ չկարողանալով իրադրությունը դուրս բերել փակուղուց:
Վարչապետի պաշտոնում Մեյին փոխարինած Բորիս Ջոնսոնը պնդում էր, որ երկիրը ԵՄ-ն լքի հոկտեմբերի 31-ին՝ գործարքով կամ առանց դրա, սակայն խորհրդարանի ընդունած օրենքի պատճառով ստիպված եղավ հոկտեմբերի 19-ին դիմել ԵՄ-ին՝ Brexit-ը մինչև 2020 թվականի հունվարի 31-ը հետաձգելու խնդրանքով:
