12.11.2024 | 23:27
Գրետա Թունբերգը ժամանել է Հայաստան
ԱՄՆ Կոնգրեսում Հայոց ցեղասպանության հարցով պատմական քվեարկություն կանցկացվի
Քաղաքականություն
25.10.2019 | 12:25
ԱՄՆ Կոնգրեսի հայկական հարցերով հանձնաժողովի համանախագահ Ֆրենկ Փալոնեն հայտնել է Ներկայացուցիչների պալատում Հայոց ցեղասպանության ճանաչման և հիշատակի բանաձևի շուրջ քվեարկության մասին:
«Հաջորդ շաբաթ Ներկայացուցիչների պալատում Հայոց ցեղասպանության պաշտոնական ճանաչման բանաձևի պատմական քվեարկություն կկայանա: Ամերիկան պետք է դեմ հանդես գա մարդկության դեմ հանցագործություններին, առավել ևս, որ Թուրքիան Հյուսիսային Սիրիայում նոր էթնիկ զտմամբ է սպառնում»,- Twitter-ում գրել է կոնգրեսականը:
Հայկական հարցերով հանձնաժողովի հրապարակած հայտարարությունում նշվում է, որ 1915-1923 թվականներին Օսմանյան կայսրությունում իրագործված Հայոց ցեղասպանությունը, որը 1.5 մլն հայի կյանք է խլել, արձանագրվել է նաև այդ ժամանակվա ամերիկացի դիվանագետների կողմից:
«Բազմաթիվ ամերիկացիներ տեղյակ չեն 20-րդ դարի առաջին ցեղասպանության, ինչպես նաև ԱՄՆ-ի մարդասիրական ջանքերի մասին, որոնց արդյունքում բազմաթիվ կյանքեր են փրկվել: Հիմա, երբ Թուրքիան հյուսիսային Սիրիայում արշավ է սկսել, որի արդյունքում հարյուրավոր քաղաքացիական անձինք են սպանվել և տեղահանվել, կարևոր է, որպեսզի Ներկայացուցիչների պալատը հստակ և ուղիղ խոսի մարդկության դեմ հանցագործությունների մասին, որոնք տեղի են ունեցել և՛ անցյալում, և՛ մեր օրերում»,- ասվում է հայտարարությունում:
Ներկայացուցիչների պալատի թիվ 296 բանաձևը ներկայացվել է 2019թ. ապրիլի 8-ին, դեմոկրատ Ադամ Շիֆի կողմից, իսկ Սենատի թիվ 150 բանաձևը ներկայացրել է սենատոր Ռոբերտ Մենենդեսը՝ ապրիլի 9-ին:
