Քաղաքականություն
15.10.2019 | 20:40Factor.am-ի հարցազրույցը Մարդկային զարգացման միջազգային կենտրոնի ղեկավար Թևան Պողոսյանի հետ
– Վիտալի Բալասանյանն այսօր Ստեփանակերտում մամուլի ասուլիս է հրավիրել և բավական կոշտ հայտարարություններ է արել: Մասնավորապես՝ Նիկոլ Փաշինյանն Արցախի հիմնախնդրի կարգավորման հարցով որևէ տեսլական չունի, նա շարունակում է Լևոն Տեր-Պետրոսյանի քաղաքականությունը և, ընդհանրապես, Արցախի հարցում գործող իշխանությունները քաղաքականությունը գնահատել է դավաճանական: Դուք ինչպե՞ս եք գնահատում այս հայտարարությունները:
– Ընդհանրապես պետք է հասկանալ, որ Արցախում տեղի է ունենում նախընտրական պայքար և, բնականաբար, տարբեր թեկնածուներ տարբեր տեսակետներ են ասելու: Պարզապես եկեք հիշենք, օրինակ, 2017թ. խորհրդարանական ընտրությունների ժամանակահատվածը: Հայաստանում էլ տարբեր քաղաքական ուժեր ասում էին՝ պետք է զիջումների գնանք, հողեր հանձնենք, արցախցին ո՞նց էր զգում իրեն այդ ժամանակ:
– Բայց հիմա ամենաաղմկահարույցն ու ակտիվը, փաստորեն, Վիտալի Բալասանյանն է…
– Այսօր ինքն է խոսում, վաղը խոսելու է Մասիս Մայիլյանը, մյուս օրը խոսելու է Արայիկ Հարությունյանը… Մենք բոլորս այստեղ պետք է կարողանանք հասկանալ, որ նախընտրական ժամանակահատված է, քաղաքական տեսակետներ են արտահայտվում: Ամեն մեկը՝ իր պատկերացմամբ, իր ասելով, բայց դրանք ասվում են արցախցիների համար: Ա՛յ, երբ Վիտալի Բալասանյանը գար, Երևանի մեջտեղում այդ մամուլի ասուլիսը տար, միգուցե՝ կարող էր ինձ համար հետաքրքիր լինել այն տեսակետից, որ այստեղ ինչ ենք անելու: Բայց նա ասում է Արցախում, արցախցիների համար, արցախցիները կլսեն նրան, իրենց որոշումը կկայացնեն: Ես կցանկանայի՝ դիսկուրսը, որ մենք ենք սխալ թույլ տալիս Հայաստանում, երբ ամբողջ քաղաքական պայքարը գնում է անձերի քննադատության և խնդիրների վրա, Արցախում դա չլիներ: Ես ուրախ կլինեմ, որ թեկնածուները սկսեն խոսել իրենց թիմերի մասին, իրենց ծրագրերի մասին: Բայց գնացել են սրացումներ, եղել են մեղադրանքներ, հիմա գալիս են ինչ-որ պատասխաններ, բայց ես ուրախ կլինեմ, որ մեր քաղաքական մշակույթից այս կոլացիան հանենք:
– Նշում եք, որ նախընտրական շրջան է, և այդ համատեքստում եք տեսնում Վիտալի Բալասանյանի հայտարարությունները, բայց, ի վերջո, եթե նա այդ հայտարարությունները Երևանում չի անում, Երևանից արձագանքներ են գնում: Սա, կարծում եք, հակասություն չէ՞ երկու երկրների քաղաքական վերնախավերի միջև:
– Վերնախավը, այսօր տեսա, Բակո Սահակյանն ու Նիկոլ Փաշինյանը շատ լավ հանդիպում էին: Բայց այդտեղից էլ գալիս է խնդիրը, որ երբ Նիկոլ Փաշինյանն ասում է՝ Արցախի նախագահ Բակո Սահակյանի հետ եմ հանդիպում, քոմենթներում գրում են՝ «ի՞նչ նախագահ, մարզպետ» և այլն: Հիմա խնդիրն այդ է. մենք ինքներս կարողացել ենք ամեն ինչ ճիշտ անել, որտեղ մարդիկ նեղված չլինե՞ն: Այնտեղի քաղաքական կուսակցությունները պատրաստվում են ընտրությունների՝ ասելով, որ մենք ԱՀ Ազգային ժողովի ընտրությունների ենք գնում, իրենց ասում են՝ դուք ով եք: Մենք էլ պետք է հասկանանք, որ այս դիսկուրսը միակողմանի չի կարող լինել՝ մենք այստեղից ինչ ուզենք՝ ձեզ ասենք, այդտեղից ոչ մի բան չլսենք: Իսկ արդյո՞ք ես այստեղից պետք է թեկնածուների քննարկեմ, այլ ոչ թե գնամ և օգնեմ գործընթացին: Գնանք, ճիշտ հարցերով օգնենք, որովհետև, այսպես թե այնպես, մարտի 31-ին տեղի են ունենալու ընտրություններ, արցախցիներն այդ ընտրություններին մասնակցելու են և ձևավորելու են այդ իշխանությունները: Հիմա չգնա՞նք՝ օգնենք: Դա չի նշանակում, որ պետք է մոռանանք «միացում» օրակարգը, չի նշանակում, որ պետք է մոռանանք Արցախ-Հայաստան-Սփյուռք եռամիասնությունը:
– Վրաստանի վարչապետ Գեորգի Գախարիան է Հայաստանում: Տարածաշրջանային այցի շրջանակում առաջինը եղել է Ադրբեջանում, և որոշ փորձագետներ կարծիք են հայտնում, որ առաջինը Բաքու այցելելով՝ ևս մեկ անգամ ընդգծել է տարածաշրջանում իր առաջնահերթությունները: Համաձա՞յն եք այս տեսակետին:
– Ինչքան հիշում եմ՝ Վրաստանի բոլոր վարչապետերն իրենց տարածաշրջանային այցը սկսելիս առաջինն այնտեղ են գնում: Ունեն նավթային շահեր, ունեն գազի և նավթի տարանցում, երկաթգծի հարց, համայնքներն էլ քանակական առումով չեն զիջում իրար: Այդ ամենը հասկանալի է: Այլ խնդիր է, թե մենք ինչ պետք է անենք, կարողանանք գիտակցել և ճիշտ քաղաքականություն վարել, որպեսզի Վրաստանն ընկալի, որ չի կարող Հայաստանի շահերը տրորելով անցնի, այլ պետք է միշտ հաշվի առնի: Այդ ամենը մեր ձեռքում պետք է լինի:
Հարցազրույցն ամբողջությամբ՝ տեսանյութում:
Թամարա Հակոբյան
