Կոռուպցիան վնասակար է առողջությանը. ՏԵՍԱՆՅՈՒԹ

Թավշյա հեղափոխությունից հետո հարուցված աղմկահարույց մի շարք քրեական գործերով անցնող անձանց նկատմամբ մեղադրանք հարուցելուց հետո հայտնի դարձավ, որ նրանք լուրջ առողջական խնդիրներ ունեն։ Factor.am-ը վերհիշել է այն նախկին պաշտոնյաներին, որոնց մեղադրանքներն ախտահարել են նրանց առողջությունը։

2018 հունիսի 16-ին Երկրապահ կամավորական միության նախկին նախագահ Մանվել Գրիգորյանին ԱԱԾ-ն բերման ենթարկեց: Նա մեղադրվում է ապօրինի կերպով զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակություն կազմակերպելու համար:

Գրիգորյանը մինչ օրս կալանքի տակ է, բայց ոչ կալանավայրում։ Նա գտնվում է «Նաիրի» բժշկական կենտրոնում, առողջական խնդիրների պատճառով դատական նիստերին չի ներկայանում: Պաշտպանները պնդում են, որ Գրիգորյանի կյանքին վտանգ է սպառնում, և նրա առողջական վիճակը ծանր է:

2018 թվականի հոկտեմբերի 6-ին ձերբակալվեց, ապա կալանավորվեց խոշոր չափերի՝ շուրջ 7 միլիոն դոլար կաշառք տալուն օժանդակելու համար մեղադրվող Սամվել Մայրապետյանը։ Դեկտեմբերի 27-ին, սակայն, Մայրապետյանը 30 միլիոն դրամ գրավով ազատ արձակվեց, իսկ օրեր անց լքեց Հայաստանը, քանի որ, ըստ պաշտպանական թիմի, ուներ առողջական խնդիրներ։ Մայրապետյանի՝ երկիրը լքելու հարցը լուծվեց ՄԻԵԴ-ի որոշումից հետո, որը Հայաստանի իշխանություններին պարտավորեցրել էր վերադարձնել Մայրապետյանի անձնագիրն ու թույլատրել բուժման նպատակով մեկնել Գերմանիա: Սամվել Մայրապետյանը դեռևս Գերմանիայում է, պաշտպանի հավաստմամբ՝ գտնվում է վերականգնողական փուլում:

Մարտի 1-ի գործով առանցքային մեղադրյալ, ՀՀ երկրորդ նախագահ Ռոբերտ Քոչարյանը վերջին մեկ ամսում երեք անգամ ՔԿՀ-ից տեղափոխվեց «Իզմիրլյան» բժշկական կենտրոն: Սկզբում՝ ընդհանուր հետազոտության, ապա նաև՝ վիրահատության։ Քոչարյանի պաշտպանները պնդում են, որ լուրջ խնդիր չկա, նա շուտով կապաքինվի։ Ռոբերտ Քոչարյանը, հիշեցնենք, մեղադրվում է սահմանադրական կարգը տապալելու և խոշոր չափի կաշառք ստանալու համար:

Կրկին Մարտի 1-ի գործով, սակայն այս անգամ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար մեղադրվող ՀՀ նախկին փոխվարչապետ Արմեն Գևորգյանը վերջերս դատարանից թույլտվություն խնդրեց Ավստրիա մեկնելու համար: Ըստ պաշտպանի՝ Գևորգյանը պետք է բուժզննում անցներ՝ սրտի անոթների հետ կապված։ Դատարանը, սակայն, Գևորգյանին չթույլատրեց երկրից մեկնել:

ԱԱԾ մեկուսարանից պարբերաբար քաղաքացիական հիվանդանոց է տեղափոխվում այս տարվա օգոստոսի 30-ից կալանքի տակ գտնվող ՊԵԿ նախկին նախագահ, ֆինանսների նախկին նախարար Գագիկ Խաչատրյանը: Նրա պաշտպանը ևս պնդում է, որ Խաչատրյանն ունի առողջական լուրջ խնդիրներ: Նախկին պաշտոնյան մեղադրվում է պաշտոնեական դիրքի չարաշահման և առանձնապես խոշոր չափով վատնում կատարելու համար։

Ստացվում է, որ կոռուպցիան վնաս է ոչ միայն երկրի և պետության, այլև դրանում մեղադրվողների առողջության համար։

Մանրամասները՝ տեսանյութում:

Լիլիթ Շաբոյան