09.12.2025 | 23:31
Եվրոպական հանձնաժողովը հետաքննություն է սկսել Google-ի դեմ
Հայկական հումանիտար խումբը Սիրիայից հետ չի կանչվելու, այն շարունակելու է առաքելությունը
Քաղաքականություն
10.10.2019 | 11:37
Սիրիայում հումանիտար առաքելություն իրականացնող խմբի ղեկավարի հետ րոպեներ առաջ ենք խոսել, առաքելությունը բնականոն հունով շարունակվում է։ Այս մասին Factor.am-ի հետ զրույցում ասաց Հումանիտար ականազերծման և փորձագիտական կենտրոնի հասարակայնության հետ կապերի պատասխանատու Նազելի Էլբակյանը:
«Մերոնց մշտական տեղակայման վայրը բավական հեռու է Ղամիշլի քաղաքից։ Խմբին այլ հանձնարարություն չի տրվել, մեր բժիշկներն ու ականազերծողները Հալեպում շարունակում են իրենց ամենօրյա առաքելությունը։ Հայկական հումանիտար խումբը հետ չի կանչվելու։ Այս պահի դրությամբ որոշումն այսպիսին է»,- ասաց նա:
Հիշեցնենք, որ հոկտեմբերի 9-ին Թուրքիայի պաշտպանության նախարարությունը հայտարարել էր Սիրիայի հյուսիս-արևելքում վերգետնյա հարձակում սկսելու մասին։ Ermenihaber-ի փոխանցմամբ՝ մինչ այս պահը կրակի տակ է առնվել քուրդ գրոհայինների 181 հենակետ։
Օդային հարվածներից բացի՝ մարտի մեջ են մտել նաև թուրքական զինուժի ցամաքային ուժերը։ Նշվում է, որ գործողության շրջանակում Թուրքիայի օդուժը թուրք-սիրիական սահմանից 30 կմ խորացել է դեպի Սիրիայի տարածք։ Գործողության ընթացքում օգտագործվում են F-35 կործանիչներ, տանկեր։
Միջազգային, այդ թվում՝ քրդական լրատվամիջոցները հայտնում են, որ թուրքական բանակի գործողությունների հետևանքով խաղաղ բնակչության շրջանում արդեն զոհեր կան: Թուրքական լրատվամիջոցները չեն հաստատում այս տեղեկությունը։
Նարեկ Կիրակոսյան
