Ռոբերտ Քոչարյանը կարող էր ակնկալել ավելի հեղինակավոր մարդկանց աջակցություն. Հրանուշ Խառատյան. ՏԵՍԱՆՅՈՒԹ

Ազգագրագետ, հասարակական գործիչ Հրանուշ Խառատյանը Factor.am-ի հետ զրույցում վերջին օրերի ամենակարևոր իրադարձությունը համարեց ԱՄՆ նախագահ Դոնալդ Թրամփի որոշումը՝ ամերիկյան զորքերը Սիրիայից դուրս բերելու մասին։ «Թրամփը հայտարարեց, որ Սիրիայից զորքերը դուրս է բերում, և տարածքը փաստացի հանձնում է Թուրքիային։ Սա էլ Հայաստանի հետ ուղղակի կապ ունեցող և լուրջ երևույթ է»,- ասաց ազգագրագետը։

Նրա խոսքով՝ հետագա զարգացումները կախված կլինեն մասնակից երկրների դիրքորոշումներից. «Եվ դա, անկասկած, անդրադառնալու է Հայաստանի ու Հայաստանի խնդիրների վրա»։

Խառատյանի կարծիքով՝ ՌԴ-ն կարող է ավելացնել ռուսական ներկայությունը Սիրիայում, իսկ քրդերի հետ կապված հնարավոր են նոր ռազմական գործողություններ։

Մարտի 1-ի գործով կալանավորված երկրորդ նախագահ Ռոբերտ Քոչարյանը թեժ աշուն էր խոստացել։ Հարցին՝ նկատո՞ւմ է թեժ աշնան նախադրյալներ, Խառատյանը պատասխանեց, որ կարծում է՝ այո՛, հենց հիմա էլ թեժ է. «Ուրիշ խնդիր է, թե Ռոբերտ Քոչարյանի ակնկալած թեժն ինչ էր»։ Ազգագրագետի խոսքով՝ եթե նա ակնկալում էր քաղաքական ու հասարակական կոնսոլիդացիա, ապա նման կոնսոլիդացիա Ռոբերտ Քոչարյանի անձի շուրջ տեղի չունեցավ. «Կարծեք թե չի երևում նման հեռանկար»։

Ինչ վերաբերում է նրան, թե ինչ ազդեցություն ունեցավ Ռոբերտ Քոչարյանի ազատ արձակման պահանջով երեկ տարածված նամակ-հայտարարությունը, որը ստորագրել էին Արցախի ու Հայաստանի հասարակական գործիչներ, նախկին պաշտոնյաներ, ազգագրագետն ասաց. «Տխուր արձագանքներ: Կարծում եմ՝ Ռոբերտ Քոչարյանն այն անձը չէր, որի պաշտպանության համար հենց այս ցանկով պիտի հանդես գային: Քոչարյանը կարող էր ակնկալել ավելի հեղինակավոր՝ տարբեր իմաստներով հեղինակավոր ուժի դիրքեր ունեցող, ռեսուրսների հնարավորություն ունեցող մարդկանց աջակցություն կամ գործողություններ»։

Ըստ Խառատյանի՝ անհաջող էր կազմված բուն հայտարարության տեքստը։ «Այս տեքստը Ռոբերտ Քոչարյանին չի պաշտպանում»,- ասաց նա։

ՍԴ նախագահ Հրայր Թովմասյանի հրաժարականի պահանջով քվեարկությանը չմասնակցելու՝ ԲՀԿ դիրքրոշումը որոշ շրջանակներում նույնպես մեկնաբանվեց որպես աջակցություն Ռոբերտ Քոչարյանին։ Հրանուշ Խառատյանը ևս այդպես է համարում. «Ես միշտ համարել եմ և շատերն են համարում, որ ԲՀԿ-ն Ռոբերտ Քոչարյանի լծակ-կցորդն է։ Գուցե հիմա հարաբերությունների մակարդակը փոխվել է, բայց ոչ այն աստիճան, որ ԲՀԿ-ն պարտավորություն չունենա Քոչարյանի նկատմամբ կամ Քոչարյանն ինքը դեռ ազդեցություն չունենա ԲՀԿ-ի վրա՝ լինի դա տնտեսական լծակ, լինի դա անցյալի կոմպրոմատի հրապարակման տագնապ»։

Ըստ Խառատյանի՝ ԲՀԿ-ն երբեք չունի և չի կարող ունենալ ինքնուրույն կուսակցական դիրքորոշում. «Ինչպես ծնվել է, այդպես ապրել է, այդպես գործել է և շարունակում է այդպիսին մնալ։ Դա հրահանգի մարդկանց խումբ է և այդ հրահանգի՝ իր հնարավորությունների ծավալով կատարողն է»:

Անդրադառնալով նախկին ոստիկանապետ Վալերի Օսիպյանի՝ վարչապետի գլխավոր խորհրդականի պաշտոնից հրաժարականին, Խառատյանն ասաց. «Ինձ համար տարօրինակ էր Վալերի Օսիպյանին խորհրդական նշանակելը»։

Հարցազրույցն ամբողջությամբ՝ տեսանյութում։

Մարինե Խառատյան