28.11.2024 | 16:48
ՌԴ-ն պատրաստվում է Արևմուտքի դեմ պատերազմի՝ ուղիղ ռազմական առճակատման․ Գերմանիայի հետախուզական ծառայության ղեկավար
ԱՄՆ վարչակազմը վերահաստատում է՝ ամերիկյան զորքերը դուրս կբերվեն Սիրիայից
Քաղաքականություն
08.10.2019 | 12:06
ԱՄՆ նախագահ Դոնալդ Թրամփը վերահաստատում է իր որոշումը Սիրիայի հյուսիսից ամերիկյան զորեքերը դուրս բերելու մասին: Այս որոշման ընդդիմախոսները պնդում են, որ դա կհարվածի ԱՄՆ-ի դաշնակից Սիրիայի դեմոկրատական ուժերին և բացասաբար կազդի ԴԱԻՇ-ի դեմ պայքարի վրա. գրում է amerikayidzayn.com-ը:
Սպիտակ տունը վերահաստատել է իր որոշումը ամերիկյան զորքերը Սիրիայի հյուսիսից դուրս բերելու կապակցությամբ՝ ընդգծելով, որ ԱՄՆ ռազմական ուժերը ԴԱԻՇ-ի խալիֆայության դեմ հաղթանակից հետո այլևս չպետք է մասնակցի այնտեղ որևէ ռազմական գործողության:
Այս հայտարարությունից ժամեր անց քրդական Hawar լրատվական գործակալությունը հաղորդեց, որ Սիրիայի դեմոկրատական ուժերը մեղադրում են Վաշինգտոնին ԱՄՆ-Թուրքիա համաձայնագրի իր պարտավորությունները չկատարելու համար:
Իր հերթին երկուշաբթի օրը Թուրքիայի նախագահ Ռեջեփ Էրդողանը հայտնել է, որ հեռախոսազրույց է ունեցել ԱՄՆ նախագահ Թրամփի հետ ամերիկյան զորքերի դուրսբերման վերաբերյալ:
Ըստ Էրդողանի, նախագահ Թրամփը նշել է , որ ամերիկյան զորքերի դուրսբերումը արդեն ընթացքի մեջ է և կշարունակվի:
Թրամփի վարչակազմը հայտարարել է, որ շուտով Թուրքիան գործողություններ կիրականացնի Հյուսիսային Սիրիայի խորքում, որը դժգոհություն է առաջ բերել Սիրիայի դեմոկրատական ուժերի շրջանում: Վերջիններս գտնում են, որ այս գործողությունները բացասաբար կազդեն ԴԱԻՇ-ի դեմ պայքարի վրա: Երկուշաբթի օրը սակայն ԱՄՆ նախագահ Դոնալդ Թրամփը իր թվիթերյան գրառման մեջ նախազգուշացրել է թուրքական կողմին, որ կդիմի կոշտ տնտեսական պատժամիջոցների, եթե թուրքական կողմը հարվածի քրդերին:
ՄԱԿ-ը ևս արձագանքում է այս զարգացումներին՝ ընդգծելով այս տարածաշրջանում խաղաղ բնակչության անվտանգության ապահովման կարևորությունը: Ըստ կառույցի՝ անհրաժեշտ է պատրաստ լինել ամեն տեսակի զարգացումների:
Սպիտակ տան հայտարարությունը դուրսբերման մասին դժգոհություններ է առաջացրել նաև Վաշինգտոնում: Նախկին հատուկ բանագնաց Բրետ ՄաքԳուրքն ընդգծել է, որ այսպիսով ամերիկյան կողմը ցուցադրում է իր անտեղյակությունը տեղում ընթացող զարգացումների վերաբերյալ, իսկ ԱՄՆ ազդեցիկ հանրապետական սենատոր Լինդսի Գրեհեմը նշել է, որ եթե մամուլի հաղորդումներն այս առիթով իրականություն են, ապա դա նման է աղետի: Ավելի ուշ սենատորը խոստացել է հանդես գալ Թուրքիային պատժամիջոցների ենթարկելու ու ՆԱՏՕ-ից հեռացնելու նախաձեռնությամբ քրդերի դեմ հարձակման դեպքում:
