Քաղաքականություն
02.10.2017 | 13:44Հանրային ծառայության պաշտոն զբաղեցրած կամ զբաղեցնող ցանկացած անձ պետք է հայտարարագրի նաև զինծառայության հետ իր և իր հետ փոխկապակցված անձանց հարաբերությունները: Այս մասին այսօր Պաշտպանության նախարարությունում պաշտոնավարման տարին ամփոփող ասուլիսի ընթացքում հայտարարեց նախարար Վիգեն Սարգսյանը:
Վիգեն Սարգսյանն առաջիկայում օրենսդրական նախաձեռնությամբ հանդես կգա, որպեսզի բարձրաստիճան պաշտոնյաներն ու նրանց հետ փոխկապակցված անձինք իրենց գույքի և եկամուտների հայտարարագրերում անդրադառնան նաև բանակում ծառայելու հարցին: Նախարարն այսօր պարզաբանեց նման նախաձեռնությամբ հանդես գալու անհրաժեշտությունը. «Այսինքն՝ ծառայե՞լ է , չի ծառայել, եթե չի ծառայել, ազատված է, տարկետում ունի, իսկ եթե ծառայել է, ապա այս մեկն արդեն կամընտիր, առաջարկում եմ, որ իրավունք ունենա նշի, եթե ծառայել է մարտական հերթապահություն իրականացնող զորամասում»:
Ըստ նախարարի՝ դա առաջին փուլում գոնե բավական է հանրության ուշադրությունն այդ խնդրի վրա ևս մեկ անգամ սևեռելու, իսկ հնարավոր շահառուներն էլ երկար մտածելու հնարավորություն կստանան՝ մինչև բանակից ազատվելու փորձերն ու տարկետում ձևակեպելը:
Factor.am-ը նախարարից հետաքրքրվեց՝ հնարավո՞ր է հայտարարագրումն ունենա նաև իրավական հետևանք և, օրինակ, ներկայացված հայտարարագիրն անհրաժեշտության դեպքում դառնա քննության առարկա, Սարգսյանն ասաց. «Ես չեմ կարող ասել՝ ինչ հետևանք կունենա, սա ընդամենը հայեցակարգ է և դեռ պետք է միս ու արյուն ստանա՝ օրենսդրական ձևակերպումների տեսքով»:
Ռազմական գերատեսչության ղեկավարը նկատեց՝ ինքն անձամբ կուզենա, որ փոփոխություններից բխեն նաև իրավական հետևանքներ, ուստի փորձելու են ձևակերպումներն այդկերպ տալ:
Մանրամասները՝ տեսանյութում:
Շողիկ Գալստյան
