«Պարը լեզու է առանց խոսքերի». ՀՀ նախագահի տիկինը ներկա է գտնվել պարարվեստի «Նաիրյան» համահայկական մրցանակաբաշխությանը

Հայաստանի Հանրապետության նախագահի տիկին Նունե Սարգսյանը Ալ. Սպենդիարյանի անվան օպերայի և բալետի ազգային ակադեմիական թատրոնում ներկա է գտնվել պարարվեստի «Նաիրյան» համահայկական մրցանակաբաշխությանը:

«Պարը լեզու է առանց խոսքերի: Դարեր շարունակ մենք` հայերս, պարել ենք՝ փորձելով արտահայտել մեր հույզերը, զգացմունքները, հարաբերությունները: Մենք ունենք պարի հարուստ պատմություն»,- մրցանակ հանձնելով Երևանի պարարվեստի պետական քոլեջին` նշել է Նունե Սարգսյանը: Նա նկատել է, որ հայկական բալետը ևս հին ավանդույթներ ունի, մասնավորապես հիշատակելով ազգությամբ հայ, բալետի հանրահայտ պարուհի Ագրեպինա Վագանովային, որի անունով է կոչվում Սանկտ Պետերբուրգի ռուսական բալետի ակադեմիան, և որը մեծ ավանդ է ունեցել համաշխարհային բալետի զարգացման գործում:

Նունե Սարգսյանն ընդգծել է, որ պետք է հպարտ լինենք աշխարհի տարբեր բեմերում հանդես եկող բոլոր հայ պարողներով: «Նրանք հայկական մշակույթի դեսպաններն են: Պետք է գնահատենք, ուրախանանաք և հպարտանանք նրանցով»,-ասել է նա:

Երևանի պարարվեստի պետական քոլեջի տնօրեն Հասմիկ Մարկոսյանը կոլեկտիվի անունից շնորհակալություն է հայտնել Նունե Սարգսյանին՝ նշելով, որ նա քոլեջի ամենամեծ բարեկամն է: «Նա հաճախ է այցելում քոլեջ և մեծ հետաքրքրությամբ հետևում մեր աշակերտների ելույթներին: Նրա շնորհիվ է, որ մեր երկու սաները հիմա գտնվում են Մոսկվայի Մեծ թատրոնում և մասնակցում են վարպետության դասերի»,-ասել է Հասմիկ Մարկոսյանը՝ ավելացնելով, որ տիկին Սարգսյանը աջակցել է նաև քոլեջի վերանորոգմանը: Տնօրենը նաև տեղեկացրել է, որ առաջիկայում բեմադրելու են մանկական բալետ` ըստ Նունե Սարգսյանի «Քաչալ ոզնին» հեքիաթի: