04.08.2026 | 23:08
Հաշտարարների պալատի կրթական ծրագիրը ստացել է պետական երաշխավորում
Սիրիայում հումանիտար առաքելություն իրականացնող խումբը մոտ 91 հազար ք.մ. տարածք է ականազերծել. Ռուբեն Առաքելյան
Քաղաքականություն
01.10.2019 | 14:38
Հումանիտար առաքելություն իրականացնող հայկական խումբը սեպտեմբերի 20-27-ը Սիրիա կատարած այցի ընթացքում տեղական իշխանություններին է հանձնել մոտ 91 հազար ք.մ. ականազերծված և մաքրված տարածք՝ Հալեպ նահանգի ալ-Հուսեյնի բնակավայրի մերձակայքում:
Այս մասին այսօր լրագրողների հետ զրույցում հայտնեց Հումանիտար ականազերծման և փորձագիտական կենտրոնի տնօրեն Ռուբեն Առաքելյանը:
Նրա խոսքով՝ հայ մասնագետները տեղակայման վայրից ականադաշտ են տեղափոխվել հատուկ մարտական զրահապատ մեքենաներով: Ականազերծված տարածքների հանձնման արարողության ընթացքում նահանգային և համայնքային իշխանությունների ներկայությամբ տարածքը նորից ստուգազննվել է:
«Գոհունակությամբ ընդունվեց մեր կատարած աշխատանքը: Շատ ջերմ խոսքեր հնչեցին՝ ուղղված թե՛ Հայաստանի կառավարությանն ու ժողովրդին, թե՛ հումանիտար առաքելության խմբին: Սիրիան շատ լավ էր ընդունել նաև նախորդ անգամ մեր ուղարկած օգնությունը»,- նշեց Ռուբեն Առաքելյանը: Նա հավելեց, որ այսօր ՀՀ հումանիտար առաքելությունը միակն է, որը Սիրիայում իրականացնում է ականազերծում. «Այն էլ, կարելի է ասել, պատերազմական պայմաններում, և դա ողջունվում է Սիրիայի կողմից»:
