3 ընկերություն հարկային արտոնություն ստացավ՝ ներդրումներ անելու պայմանով․ ՏԵՍԱՆՅՈՒԹ

Կառավարությունը սեպտեմբերի 26-ի նիստում հարկային արտոնություն տվեց մի շարք ընկերությունների․ մասնավորապես «ԷԼԷՅ ՍՈԼԱՐ» սահմանափակ պատասխանատվությամբ ընկերությունը ստացավ «Ալյանս» ազատ տնտեսական գոտու «ՌԱՕ Մարս»  ՓԲԸ-ի տարածքում շահագործողի թույլտվություն։ «ԷԼԷՅ ՍՈԼԱՐ» ՍՊԸ-ն նախատեսում է «Ալյանս» ազատ տնտեսական գոտում հիմնել ֆոտովոլտայիկ պանելների արտադրություն: Ծրագրի ընթացքում արտահանման տարեկան ծավալները նախատեսված է 137 500 ԱՄՆ դոլարից հասցնել  11 880 000 ԱՄՆ դոլարի:

Նախատեսված է արտադրված արևային պանելների առնվազն 75%-ն արտահանել ԱՄՆ, իսկ մնացածը՝ վաճառել Հայաստանում, Վրաստանում, Ռուսաստանում և Իրանում:

Ծրագրի շրջանակներում իրականացվելիք ներդրումները կկազմեն մոտ 2,6 մլն ԱՄՆ դոլար:

Ծրագրի ընթացքում կստեղծվի 15 նոր աշխատատեղ` 300 հազար դրամ միջին աշխատավարձով:

Կառավարության մեկ այլ որոշմամբ հարկային արտոնություն ստացավ Վանաձոր քաղաքում գործող «ԳԼՈՐԻԱ» ԿԱՐԻ ՖԱԲՐԻԿԱ սահմանափակ պատասխանատվությամբ ընկերությունը։

Ընկերությունը նախատեսում է իրականացնել 3 մլրդ դրամի ներդրում նոր սարքավորումների ձեռքբերման և նոր մասնաճյուղերի վերանորոգման համար: Ներկայումս առկա է 1100 աշխատատեղ: Նախատեսվում է ներդրումային ծրագրի շրջանակում ստեղծել  200-250 նոր աշխատատեղ` 120,000 ՀՀ դրամ միջին աշխատավարձով։

Ծրագրով նախատեսված արտադրանքի ընդհանուր ծավալը կկազմի 10 մլրդ ՀՀ դրամ, որից 500 մլն ՀՀ դրամի արտադրանքը կիրացվի ՀՀ տարածքում, 3.5 մլրդ ՀՀ դրամի արտադրանքը` ԵՏՄ այլ անդամ երկրների տարածքում, 6 մլրդ ՀՀ դրամի արտադրանքը` երրորդ երկրների տարածքում: Արտոնություն ստանալու համար ներկայացված հումքի արժեքը կազմում է  8,325,143,351 ՀՀ դրամ: Մաքսատուրքի ազատման արտոնությունը կազմում է 752,798,002  ՀՀ դրամ:

Գերակա ոլորտում իրականացվող ներդրումային ծրագրի շրջանակներում ներմուծված (ներմուծվող) տեխնոլոգիական սարքավորումները, դրանց բաղկացուցիչ ու համալրող մասերը, հումքը և  նյութերը ներմուծման մաքսատուրքից ազատելու արտոնություն ստացավ նաև  «ՄՈԵՖՖ ԳՐՈՒՊ» սահմանափակ պատասխանատվությամբ ընկերությունը։

Նախատեսվում է ծրագրի շրջանակում իրականացնել  14,491,272,158 դրամի ներդրում հումքի ձեռքբերման համար: Ներկայումս առկա է 31 աշխատատեղ: Ներդրումային ծրագրի շրջանակում կստեղծվի 150 նոր աշխատատեղ` 265,000 դրամ միջին աշխատավարձով։

Ծրագրով նախատեսված արտադրանքի ընդհանուր ծավալը կկազմի 23 մլրդ 575 մլն դրամ, որից 2 մլրդ 105 մլն դրամի արտադրանքը կիրացվի ՀՀ տարածքում, 16,023,320,000 դրամի արտադրանքը` ԵՏՄ այլ անդամ երկրների տարածքում, 2,920,680,000 դրամի արտադրանքը` երրորդ երկրների տարածքում և մոտ 2.5 մլրդ դրամի արտադրանքը նախատեսվում է պահեստավորել:

Արտոնություն ստանալու համար ներկայացված ապրանքների արժեքը կազմում է  14,491,272,158 դրամ: Մաքսատուրքի ազատման արտոնությունը կազմում է 1,141,893,667 դրամ:

Մանրամասները՝ տեսանյութում։