06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Ինչո՞ւ Մխիթարյանը և Գյուլբուդաղյանցը չեն մասնակցել FIFA The Best քվեարկությանը. պարզաբանում է ՀՖՖ-ն
24.09.2019 | 12:54
Երեկ՝ սեպտեմբերի 23-ին, Միլանում ամփոփվեց FIFA The Best ամենամյա մրցանակաբաշխությունը. գրում է armsport.am-ը:
Հայաստանի Ազգային հավաքականի գլխավոր մարզիչ Արմեն Գյուլբուդաղյանցը և ավագ Հենրիխ Մխիթարյանը քվեարկությանը չէին մասնակցել: Այս հարցով ArmSport.am-ը դիմեց ՀՖՖ մամուլի ծառայություն՝ պաշտոնական մեկնաբանություն ստանալու:
«Ֆուտբոլային հանրության հարգելի անդամներ,
Երեկ Իտալիայի Միլան քաղաքում կայացավ The Best FIFA Football Awards ամենամյա մրցանակաբաշխությունը: Ըստ կանոնակարգի, մրցաշրջանի լավագույն ֆուտբոլիստի և մարզչի անվանակարգում քվեարկում են ՖԻՖԱ-ի անդամ ասոցիացիաների ներկայացուցիչները (ազգային հավաքականի գլխավոր մարզիչը, ավագը և մեդիայի 1 ներկայացուցիչ):
2019 թ. օգոստոսին ՀՖՖ-ն ունեցավ սերվերի հետ կապված տեխնիկական խնդիրներ: Հենց այդ ժամանակահատվածում է ՖԻՖԱ-ն ուղարկել քվեարկության համար նախատեսված նամակ-ձևաթուղթը, որը չի հասել հասցեատիրոջը և հենց այդ պատճառով էլ ՀՖՖ-ն չի ներկայացրել քվեարկության իր տարբերակները:
Հայաստանի ֆուտբոլի ֆեդերացիան պաշտոնապես հայտարարում է, որ չկա որևէ միտում՝ հատկապես հաշվի առնելով, որ նախորդ տարիներին ՀՖՖ-ն մշտապես ներկայացրել է քվեարկության իր տարբերակները: Հայցում ենք ֆուտբոլային հանրության, ինչպես նաև Հայաստանի ազգային հավաքականի գլխավոր մարզչի և ավագի ներողամտությունը և հավաստիացնում, որ հետագայում հետամուտ կլինենք քվեարկության պատշաճ իրականացմանը», – պաշտոնական մեկնաբանությունն ArmSport-ին փոխանցեց ՀՖՖ մամուլի քարտուղար Հայկ Կարապետյանը:
Հիշեցնենք, որ «Լավագույն ֆուտբոլիստ» անվանակարգում հաղթող ճանաչվեց Արգենտինայի հավաքականի և «Բարսելոնայի» ավագ Լիոնել Մեսսին: «Լիվերպուլի» գլխավոր մարզիչ Յուրգեն Կլոպը տարվա լավագույն մարզիչն է:
