Ի՞նչ ունեցվածք ունի ԱԱԾ տնօրենի պաշտոնակատարը

Ազգային անվտանգության ծառայության տնօրենի պաշտոնակատար Էդուարդ Մարտիրոսյանն 8 միլիոն դրամը գերազանցող ոսկյա զարդեր ունի: Այս մասին Factor.am-ը տեղեկանում է Էդուարդ Մարտիրոսյանի ունեցվածքի մասին հայտարարագրից:

Պաշտոնը ստանձնելու օրվա՝ 2018 թվականի հոկտեմբերի 16-ի տվյալներով, ԱԱԾ տնօրենի պաշտոնակատարն ունի ավտոտնակ, հողամաս, բնակարան, առանձնատուն, KIA SORENTO 2.4 և  GAZ 24 մակնիշի ավտոմեքենաներ:  Էդուարդ Մարտիրոսյանի շարժական և անշարժ գույքը մեկ տարվա ընթացքում փոփոխության չի ենթարկվել: Այս մասին տեղեկանում ենք 2019 թվականին ներկայացրած տարեկան հայտարարագրից, որի համաձայն՝ պաշտոնյան նոր գույք ձեռք չի բերել և եղածները չի վաճառել: Տեղում են նաև 8 միլիոն դրամը գերազանցող ոսկյա զարդերը:

Պաշտոնը ստանձնելու տարում Էդուարդ Մարտիրոսյանը 10 հազար դոլարի փոխառություն է հանձնել: ԱԱԾ տնօրենի պաշտոնակատարի դրամական միջոցների ավելացում կամ նվազում չեն եղել: ԱԱԾ տնօրենի տեղակալի պաշտոնը ստանձնելուց առ այսօր Էդուարդ Մարտիրոսյանն ունի 20 մլն դրամ, 95 հազար դոլար և 20 հազար եվրո: Սակայն զգալի աճել են նրա եկամուտները:

Պաշտոնը ստանձնելու տարում`2018-ին,  նա ունեցել է 4 մլն 500 հազար դրամի եկամուտ, որը գոյացել է աշխատավարձից: 2019-ին ներկայացված հայտարարագրում եկամուտները կազմում են 16 մլն 900 հազար դրամ, որից 5 մլն 900 աշխատավարձն է, իսկ 11 մլն-ը՝ ստացված փոխառությունները:

Արթուր Վանեցյանի հրաժարականից հետո Էդուարդ Մարտիրոսյանը նշանակվել է Հայաստանի Հանրապետության Ազգային անվտանգության ծառայության տնօրենի պարտականությունների ժամանակավոր պաշտոնակատար:

Նարեկ Կիրակոսյան