Քաղաքականություն
04.09.2019 | 18:27
ԼՂ հակամարտության գոտում գերիներին և ռազմագերիներին վերաբերող հարցերը պետք է լուծել դրա համար սահմանված, գոյություն ունեցող ձևաչափերում: Այս մասին այսօր տեղի ունեցած ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով ադրբեջանական կողմում հայտնված հայ զինծառայող Արայիկ Ղազարյանի ճակատագրի մասին հարցին:
«Չեմ կարծում, որ հիմա իմ կողմից լրացուցիչ քաղաքական գնահատականի կարիք կա, մենք, ամեն դեպքում, գործող մեխանիզմներ ունենք: Կան համանախագահներ, նրանք կարող են, անհրաժեշտության դեպքում, գործի դնել լրացուցիչ մեխանիզմներ՝ կողմերին լրացուցիչ աջակցություն ցուցաբերելու համար»,- ասել է նա։
Ըստ Զախարովայի, եթե կողմերն ինչ-որ հարցի լուծման գործում աջակցության կարիք ունեն, օրինակ՝ Ռուսաստանի կողմից, կարող են քննարկել երկկողմ ձևաչափով, դիվանագիտական խողովակներով։
Հիշեցնենք, որ օգոստոսի 12-ին ՊԲ զորամասերից մեկի պաշտպանական տեղամասերից մեկում 2000 թվականին ծնված զինծառայող Արայիկ Ղազարյանը լքել էր մարտական դիրքը, իսկ ադրբեջանական ԶԼՄ-ներն ավելի ուշ տեղեկացրել էին, որ զինծառայողն իրենց մոտ է։ ՀՀ պաշտպանության նախարար Դավիթ Տոնոյանը կարծում է, որ զինծառայողն ադրբեջանական կողմում հայտնվել է տեղանքում մոլորվելու արդյունքում:
Անդրադառնալով ՀՀ վարչապետ Նիկոլ Փաշինյանի՝ «Արցախը Հայաստան է և վե՛րջ» հայտարարության մասին հարցին՝ Մարիա Զախարովան նշել է, որ ՌԴ-ն ելնում է այն հանգամանքից, որ գոյություն ունի ներքին հռետորաբանություն, կան ներքին կարգավորումներ, որոնք արտացոլում են քաղաքական կուսակցությունների, շարժումների տեսակետը:
«Կա նաև այն խաղաղ գործընթացը, որում կան դրա մասնակիցները, համանախագահները, կան միջազգային ջանքեր՝ հակամարտության խաղաղ կարգավորմանը հասնելու համար: Բնականաբար, մենք ելնում ենք այն հանգամանքից, որ կողմերի հայտարարությունները պետք է լինեն այս ընդհանուր ջանքերի համատեքստում, որոնք ուղղված են հակամարտության խաղաղ կարգավորմանը»,- ասել է ՌԴ ԱԳՆ խոսնակը:
Նա հավելել է, որ նման հայտարարություններ տարբեր մակարդակներով հնչում են տարբեր կողմերից: «Գործընթացը բարդ է, երկարատև, կարծում եմ՝ արագ առաջ շարժվելու անհրաժեշտության ընդհանուր ըմբռնում կա, և հայտարարությունները պետք է համապատասխանեն ու նպաստեն այդ գլխավոր նպատակին»,- ամփոփել է Մարիա Զախարովան:
