Ամուսինները ձևական ամուսնալուծվել են, որ փեսան կարողանա կնոջ եղբոր ենթակայությամբ աշխատել

Վայոց ձորի մարզպետարանում աշխատակազմի ղեկավարի ընտանիքի որոշ անդամներ բարձր պաշտոններ են զբաղեցնում մարզպետարանում և մարզպետարանի ենթակայությամբ գործող կառույցում: Մասնավորապես, աշխատակազմի ղեկավար Կամո Սահակյանի քույրը՝ Սրբուհի Դավթյանը, մարզպետարանի աշխատակազմի կադրերի բաժնում առաջատար մասնագետ է աշխատում:

Սրբուհի Դավթյանի ամուսինը՝ Հրանտ Դավթյանը, Վայոց ձորի մարզային սոցիալական ծառայության պետն է: Factor.am-ին փոխանցված այս տեղեկությունը հաստատեց նաև աշխատակազմի ղեկավար Կամո Սահակյանը: Սակայն ուշագրավն այն է, որ ամուսիններ Սրբուհի և Հրանտ Դավթյանները ձևական ամուսնալուծվել են, որպեսզի աչքի չընկնի այն հանգամանքը, որ Հրանտ Դավթյանն աշխատում է կնոջ եղբոր ենթակայության կառույցում:

Factor.am-ի հետ զրույցում Կամո Սահակյանն այս տեղեկությունը հաստատեց: «Ինչ-որ խանգարող բան կա՞, որ չպետք է աշխատեն: Փեսան ծառայության հիմնադրման օրվանից աշխատում է: Այո՛, իրենք բաժանված են՝ աշխատանքի համար, բա էլ ինչ համար բաժանվեին»,- ասաց նա:

Հարցին՝ արհեստական ձևով ստեղծել են իրավիճակ, որ աչքի չընկնե՞ն, աշխատակազմի ղեկավարը պատասխանեց. «Իհարկե: Մենք օրենք չենք խախտում, մենք աշխատում ենք»:

Նշենք, որ «Հանրային ծառայության մասին» ՀՀ օրենքի համաձայն՝ հանրային ծառայողին և բարձրաստիճան պաշտոնատար անձին արգելվում է լինել երրորդ անձանց ներկայացուցիչն այն մարմնի հետ կապված հարաբերություններում, որտեղ ինքը գտնվում է ծառայության մեջ, կամ որն անմիջականորեն ենթակա է իրեն կամ անմիջականորեն վերահսկվում է իր կողմից: Այս դեպքում Վայոց ձորի մարզային սոցիալական ծառայությունը համարվում է մարզպետարանին ենթակա կառույց:

Հավելենք, որ, եթե Կոռուպցիայի կանխարգելման հանձնաժողովը կազմավորված լիներ, ապա նշված կանոնները սահմանվելու էին Հանրային ծառայության մասին 2018 թվականին ընդունված օրենքով: Այն սահմանում է շահերի բախման իրավիճակում գործելու արգելք հանրային բոլոր ծառայողների համար: Իսկ գործող օրենքը, որն ընդունվել է 2011-ին, արգելք սահմանում է միայն բարձրաստիճան պաշտոնտար անձանց համար:

Նարեկ Կիրակոսյան