15.12.2025 | 19:50
89 վարորդ տուգանվել է վարելիս նվագարկչի՝ ստանդարտին չհամապատասխանող լրացուցիչ ուժեղացուցիչներ օգտագործելու համար
Ջերմոցային տնտեսությունների ներկայացուցիչների հետ քննարկվել են ոլորտում առկա խնդիրները, նաև՝ Վերին Լարսին այլընտրանք ունենալու հարցը
Տնտեսություն
29.08.2019 | 13:57
ՀՀ էկոնոմիկայի նախարարությունից տեղեկացնում են, որ նախարարի տեղակալներ Արտակ Քամալյանը և Տիգրան Գաբրիելյանը հանդիպում են ունեցել ջերմոցային տնտեսությունների ներկայացուցիչների հետ՝ ոլորտում առկա խնդիրներն ու դրանց լուծման հնարավոր ուղիները քննարկելու նպատակով:
«Հանդիպման մասնակիցները ներկայացրել են ոլորտի զարգացման իրենց տեսլականը, պետության կողմից հնարավոր քայլերը, որոնք կարող են նպաստել ջերմոցաշինության ոլորտի բարելավմանն ու կարգավորմանը:
Ջերմոցատերերն անդրադարձել են նաև իրենց մտահոգող խնդիրներին, որոնք մասնավորապես վերաբերում էին ջերմատներում գազի սակագնի նվազեցմանը (ինչը կհանգեցնի տեղական արտադրանքի ինքնարժեքի նվազեցմանը), վնասատուների դեմ պայքարի արդյունավետ միջոցառումների իրականացմանը, ներկրվող թունաքիմիկատների որակի վերահսկմանը, ինչպես նաև ջերմատներում արտադրվող գյուղմթերքի իրացման հնարավորությունների ընդլայնմանը:
Մասնակիցներն ընդգծել են մատչելի տոկոսադրույքներով վարկերի տրամադրման և հարկային դաշտում բարեփոխումների իրականացման կարևորությունը:
Քննարկված թեմաների թվում էր նաև տեղական պտուղ-բանջարեղենի արտահանման գործընթացն անխափան կազմակերպելու նպատակով Վերին Լարսին այլընտրանք ունենալու հարցը:
Արտակ Քամալյանն ու Տիգրան Գաբրիելյանը պատրաստակամություն են հայտնել հավաքագրել և հանգամանորեն ուսումնասիրել բոլոր առաջարկներն ու դիտողությունները՝ ուղղված առկա խոչընդոտների վերացմանը և ջերմոցային տնտեսությունների արդյունավետ գործունեության ապահովմանը»,- ասված է հաղորդագրությունում:
