15.10.2026 | 15:59
Հայտնի է՝ երբ կմեկնարկի ձմեռային զորակոչը
«Վանաձոր–Քիմպրոմ»-ի աշխատակիցներն անժամկետ նստացույցի են պատրաստվում. «Փաստ»
20.09.2017 | 08:30
«Փաստ» օրաթերթը գրում է.
«Վանաձոր–Քիմպրոմ»–ի ջերմաէլեկտրակայանի նախկին աշխատակիցները պատրաստվում են անժամկետ նստացույց անել:
«Փաստ»–ի աղբյուրը հայտնեց, որ աշխատակիցներն այնքան ժամանակ ցույց կանեն, մինչև խնդիրը վերջնականապես լուծում չստանա և իրենք չստանան իրենց աշխատավարձերը:
Օրերս ՋԷԿ–ի աշխատակիցները կրկին փողոց էին դուրս եկել, ցանկացել հանդիպել մարզպետ Արթուր Նալբանդյանի հետ ու խնդիրը ևս մեկ անգամ քննարկել:
«Վանաձոր–Քիմպրոմ»–ի ջերմաէլեկտրակայանի աշխատակիցները շուրջ 6 տարի է պայքարում են իրենց 2011–2012 թվականների մի քանի ամսվա աշխատավարձը ստանալու համար: Արդյունքի, սակայն, չեն հասնում: Նրանք փորձում են իշխանությունների ուշադրությունն իրենց վրա հրավիրել:
«Մենք պետք է պայքարենք մինչև վերջ, որովհետև սա մեր քրտինքի արդյունքն ա, մեզ կոպեկ չեն տալիս»,– ասաց աշխատակիցներից մեկը:
Նրանք դեռ 2012–ին դատական հայց են ներկայացրել ընդդեմ ՋԷԿ–ի սեփականատեր «Ռեգիոն Էներջի» ընկերության: 2014 թվականին դատը շահել են, բայց մինչև օրս 153 աշխատողներից ոչ մեկն իր գումարը չի ստացել:
Դատարանը սնանկ է ճանաչել ընկերությունը՝ պարտավորեցնելով գույքի վաճառքից ստացվելիք միջոցներից վճարել շուրջ 130 միլիոն դրամի աշխատավարձի պարտքը: Ավելի ուշ, սակայն, պարզվել է, որ ընկերությունը գույք չունի:
Վեց տարի շարունակ դիմել են հնարավոր բոլոր պետական մարմիններին՝ դատարանից մինչև երկրի նախագահ: ՋԷԿ–ի հուսալքված աշխատակիցներն այլևս չգիտեն` ինչ անել: Նրանք վստահեցրեցին, որ անկախ ամեն ինչից, իրենք պայքարելու են մինչև վերջ: Բողոքի ցույցերն էլ կդադարեցնեն այն ժամանակ, երբ խնդիրը լուծում ստանա:
Առավել մանրամասն՝ թերթի այսօրվա համարում:
