27.09.2026 | 22:23
Համաշխարհային օլիմպիադա. Հայաստանի հավաքականները երրորդն են A խմբում. ԼՈՒՍԱՆԿԱՐՆԵՐ
Ղրղզստանը բողոքի նոտա է հղել Բելառուսին՝ Բակիևի հետ Լուկաշենկոյի հանդիպման պատճառով
Քաղաքականություն
07.08.2019 | 19:25
Ղրղզստանում Բելառուսի դեսպանատան գործերի ժամանակավոր հավատարմատար Սերգեյ Իվանովը Ղրղզստանի ԱԳՆ է հրավիրվել: «Ռեգնում»-ի փոխանցմամբ՝ այս մասին հայտնել է երկրի ԱԳՆ մամուլի ծառայությունը:
Արտաքին քաղաքական գերատեսչության ներկայացուցիչները բելառուս դիվանագետին բողոքի նոտա են հանձնել՝ կապված Ղրղզստանի նախկին նախագահ Կուրմանբեկ Բակիևի հետ Բելառուսի նախագահ Ալեքսանդր Լուկաշենկոյի հրապարակային պաշտոնական շփումների հետ:
ԱԳՆ-ում հայտարարել են, որ նման հանդիպումների ընթացքում Ղրղզստանի պետական խորհրդանիշերն օգտագործելն անթույլատրելի է: Բացի այդ, ըստ հայտարարության, Բակիևի հետ հանդիպման ժամանակ Ղրղզստանի և Բելառուսի բարեկամության մասին հիշատակումը չի համապատասխանում համագործակցության սկզբունքներին:
Բելառուսի նախագահ Ալեքսանդր Լուկաշենկոն օգոստոսի 6-ին Մինսկի Անկախության պալատում ընդունել է Ղրղզստանի նախկին նախագահ Կուրմանբեկ Բակիևին՝ վերջինի ծննդյան 70-ամյակի կապակցությամբ:
Նշենք, որ 2010 թվականից Բակիևը, ցույցերի արդյունքում իր իշխանության տապալումից հետո, ընտանիքի անդամների ու մի քանի թիմակիցների հետ Բելառուսում է բնակվում: Ղրղըզստանում Բակիևին հեռակա ցմահ ազատազրկման են դատապարտել՝ մեղադրելով բռնաճնշումներին մասնակցության համար, որոնց արդյունքում մի քանի տասնյակ մարդ է սպանվել:
Բիշքեկը բազմիցս դիմել է Մինսկին՝ Բակիևին արտահանձնելու պահանջով, սակայն մերժում է ստացել:
