Իշխանությունների ամենաուժեղ խաղաքարտը Սերժ Սարգսյանն ու Ռոբերտ Քոչարյանն են, եթե նրանք ասպարեզում երևան, ոչ ոք չի գնա նրանց հետևից. Կարեն Քոչարյան. ՏԵՍԱՆՅՈՒԹ

Factor.am-ի զրուցակիցն է քաղտեխնոլոգ Կարեն Քոչարյանը

–Պարոն Քոչարյան, հեղափոխությունից անցել է ավելի քան մեկ տարի, ինչպե՞ս այն կգնահատեք, հանրության ակնկալիքներն ու իշխանության գործողությունները որքանո՞վ էին համահունչ։

-Նոր իշխանությունները շատ դեպքերում իրենց խոստումների զոհն են դարձել։

-Օրինակներ։

-Օրինակները ես նկատի ունեմ հատկապես տնտեսական, առայժմ քաղաքական չեմ ուզում խոսել, որովհետև քաղաքական առումով, կարծեք թե, մեծ խնդիրներ չկան։ Ճիշտ է՝ հիմա ընդդիմադիր դաշտում կոնսոլիդացիա է գնում՝ կստացվի՞, թե՞ չէ՝ դա այլ խնդիր է, բայց տնտեսական առումով, թեև կա բյուջեի եկամուտների աճ, բայց վիճակագրությունը միշտ մանիպուլյատիվ բնույթ  է կրում։ Ես չեմ ասում՝ չի հավաքվել, իհարկե հավաքվել է, շատ լավ են աշխատել ՊԵԿ ստորաբաժանումները, բայց զուտ տնտեսական զարգացման առումով, այսինքն՝ այն, ինչ սպասում են շատերը, նոր տեխնոլոգիաների վրա հիմնված արդյունաբերություն, որն իր հետևից կբերի աշխատատեղերի ավելացում, մարդկանց կենսամակարդակի բարձրացում, ոչ միայն չկա, այլ չի էլ երևում։

-Բայց մի՞թե այդ 152 միլիարդը թույլ է տալիս Ձեր նշած հարցերը լուծել, որովհետև վարչապետն ասում է, որ այդ եկամուտների շնորհիվ իրենք սոցիալական մի շարք խնդիրներ են լուծել։

–Սա այն թիվն է, որը ոչ թե տնտեսական աճի հաշվին է եղել, այլ ստվերից հանած գումարն է, որը շատ քիչ է, որովհետև հանեցին ստվերից՝ 25 տոկոսով աճեց, 30 տոկոսով, 50տոկոսով, բայց դա միանգամյա է, բա հաջո՞րդ տարի ինչ է լինելու։ Չկա այն ապագայի աճը, որը պետք է բերի արդյունաբերության զարգացմանը։

-Իսկ իշխանություններին դա չհաջողվեց անել օբյեկտի՞վ, թե՞ սուբյեկտիվ պատճառներով։

-Ես կարծում եմ, որ ավելի շատ սուբյեկտիվ պատճառով է։ Դա գալիս է այն մթնոլորտից, որը ստեղծվեց և գուցե օբյեկտիվորեն ստեղծվեց, բայց ստեղծողը սուբյեկտն էր՝ նոր իշխանությունը։ Օբյեկտիվ այն առումով, որ նոր իշխանությունները սկսեցին չվստահել ոչ մեկի, այդպես հնարավոր չէ աշխատել։ Չի կարելի այդքան կասկածամիտ լինել կադրերի նկատմամբ, մարդկանց նկատմամբ, այս ամենը ստեղծեց մի մթնոլորտ, որը կործանիչ է բիզնեսի, տնտեսության համար։

-ՀՀ երկրորդ նախագահը, օրինակ, ասում է, որ կառավարման այս որակով գործող իշխանությանը հեռացում է սպասվում, այս կանխատեսումն իրատեսական համարո՞ւմ եք, կարո՞ղ են ինչ-ինչ ուժեր համախմբվել ընդդեմ նոր իշխանության։

-Կարող են, բայց իմ համոզմամբ՝ դա չի կարող լինել Ռոբերտ Քոչարյանի կամ Սերժ Սարգսյանի գլխավորությամբ, որովհետ այսօր նոր իշխանությունների ամենաուժեղ խաղաքարտը Սերժ Սարգսյանն ու Ռոբերտ Քոչարյանն են, եթե նրանք ասպարեզում երևան, ոչ ոք չի գնա նրանց հետևից, այլ խնդիր է եթե այլ քաղաքական ուժեր կամ հին քաղաքական ուժեր թարմացված դեմքերով գան նոր գաղափարներով, հնարավոր է նրանց շուրջ համախմբվեն։

Հարցազրույցն ամբողջությամբ՝ տեսանյութում։

Շողիկ Գալստյան