Գյումրիի «Շիրակ» օդանավակայանը տարանցիկ ուղի է դարձել Ռուսաստանի և Վրաստանի միջև 

Հուլիսի 8-ից, ՌԴ նախագահ Վլադիմիր Պուտինի որոշմամբ, Ռուսաստանի ու Վրաստանի միջև ավիահաղորդակցությունը դադարեցվել է: Այս իրավիճակում Հայաստանն ամենահարմար տարանցիկ ուղիներից մեկն է դարձել Ռուսաստանից Վրաստան և հակառակ ուղղությամբ տեղաշարժվողների համար: Արդյունքում Գյումրիի «Շիրակ» օդանավակայանի ծանրաբեռնվածությունը մեծացել է:

Գյումրիում աշխատող միակ «Պոբեդա» ավիաընկերությունը, ուղևորահոսքի ավելացմամբ պայմանավորված, ավելացրել է չվերթների թիվը։ Այժմ Մոսկվայից Գյումրի շաբաթական 10 չվերթ է իրականացվում։

««Շիրակ» օդանավակայանում չվերթեր իրականացնում է «Պոբեդա» ավիաընկերությունը՝ Գյումրի-Մոսկվա-Գյումրի երթուղով: Հուլիսի 10-ից սեպտեմբերի 11-ը շաբաթական 10 չվերթ կիրականացվի: Հուլիսի 10-ից մինչև այսօր՝ օգոստոսի 2-ը, իրականացվել է 35 չվերթ: Երկուշաբթի, չորեքշաբթի և ուրբաթ օրերին իրականացվում է 2-ական չվերթ, իսկ երեքշաբթի, հինգշաբթի, շաբաթ և կիրակի օրերին՝ մեկ»,- Factor.am-ի հետ զրույցում ասաց «Արմենիա» միջազգային օդանավակայաններ» ՓԲԸ-ի հանրային կապերի պատասխանատու Սաթենիկ Հովհաննիսյանը՝ հավելելով, որ հուլիսի ուղևորահոսքի տվյալներն ամփոփվելու են առաջիկա օրերին:

«Հուլիսի 10-ից հուլիսի 31-ն ընկած ժամանակահատվածում ուղևորահոսքը կազմել է  11.665 մարդ։ «Շիրակ» օդանավակայանն էլ հագեցած է անհրաժեշտ տեխնիկայով և որևէ խնդիր չունի չվերթների սպասարկման հետ կապված»,- ասաց Սաթենիկ Հովհաննիսյանը:

Նշենք նաև, որ այժմ «Շիրակ» օդանավակայանում իրականացվում են շինարարական աշխատանքներ, կառուցվում է ժամանման սրահի նոր հատվածը: Ի դեպ՝ ապրիլի 5-ին Գյումրի կատարած այցի ընթացքում վարչապետ Նիկոլ Փաշինյանը եղել է նաև «Շիրակ» օդանավակայան, տեղում ծանոթացել ներդրումային ծրագրերին ու կատարվող աշխատանքներին:

Էմմա Չոբանյան