Հասարակություն
29.07.2019 | 17:00Հուլիսի 28-ին՝ Վարդավառի օրը, ինչպես սպասվում էր, հովեկների աննախադեպ մեծ հոսք եղավ դեպի Սևան: Օրվա առաջին կեսին Երևան-Սևան-Դիլիջան ճանապարհով մեկ րոպեում միջինը անցնում էր 48 մեքենա: Այդ օրը ըստ նախնական հաշվարկների՝ նշված ճանապարհով երթևեկել է շուրջ 20 հազար տրանսպորտային միջոց. տեղեկացնում է ՀՀ ոստիկանությունը:
«Քաղաքացիների ու ճանապարհային երթևեկության անվտանգությունն ապահովելու նպատակով ոստիկանությունն անցել էր շուրջօրյա ուժեղացված ծառայության, որին ներգրավված էին ոստիկանության Գեղարքունիքի մարզային վարչության, տարածքային բաժինների, ճանապարհային ոստիկանության, ոստիկանության զորքերի, պարեկապահակետային ծառայության գնդի ծառայողները:
Ոստիկանության և «Armenian Helicopters» կազմակերպության համագործակցության շրջանակում ուժեղացված ծառայությանը ուղղաթիռից հետևում էր ոստիկանության պետ, ոստիկանության գեներալ-մայոր Վալերի Օսիպյանը:
Մինչ ծառայության անցնելը նա հանդիպեց ոստիկաններին, մաղթեց բարի ծառայություն: Տոնական տրամադրությունը չմթագնելու համար ոստիկանության պետը հորդորեց անհանդուրժող լինել և ներողամտություն չցուցաբերել օրինախախտների հանդեպ, նրանց հայտնաբերել ու ենթարկել պատասխանատվության:
Արդյունքում՝ ուժեղացված ծառայության ընթացքում ճանապարհային ոստիկանները կազմեցին վարչական իրավախախտման վերաբերյալ 1091 արձանագրություն, ճանապարհային ոստիկանության պահպանվող հատուկ տարածք տեղափոխվեց 84 մեքենա, որոնցից 60-ի վարորդները ոչ սթափ վիճակում էին:
Սևանի ափամերձ հատվածներում լիովին ապահովվեց հասարակական կարգը:
Նշենք նաև, որ մինչև ուշ գիշեր շարունակվում էր մեքենաների հոսքը դեպի մայրաքաղաք: Ճանապարհային ոստիկանության ծառայողներն առանց հանգստի ապահովեցին մեքենաների անվտանգ ու ապահով երթևեկությունը դեպի մայրաքաղաք:
Ոստիկանության ուժեղացված ծառայության արդյունքում հպարտությամբ կարող ենք փաստել, որ որևէ լուրջ միջադեպ կամ պատահար տեղի չի ունեցել»,- ասված է հաղորդագրությունում:
