02.05.2024 | 22:28
Հայաստանի մի շարք հասցեներում էլեկտրաէներգիայի անջատումներ կլինեն
Քրեական գործ է հարուցվել ՇՊՀ ռեկտորի ժամանակավոր պաշտոնակատար Երվանդ Սերոբյանի նկատմամբ
Հասարակություն
26.07.2019 | 16:01
Շիրակի պետական համալսարանի ռեկտորի ժամանակավոր պաշտոնակատար Երվանդ Սերոբյանի նկատմամբ հարուցվել է քրեական գործ։ Այս մասին իր ֆեյսբուքյան գրառմամբ տեղեկացնում է ՇՊՀ դասախոս Գագիկ Համբարյանը։
«Ինչպես ժամանակին տեղեկացրել էի, 2018-2019 թթ.-ի ուստարվա սեպտեմբեր ամսին Երվանդ Սերոբյանը չէր հաճախում դասերին, իսկ նրա դասերն առանց որևէ զեկուցագրերի և օրինական թույլտվության նրա փոխարեն պարապում էին երկու այլ դասախոսներ… Սակայն Սահակ Մինասյանի ապօրինությունը բացահայտելուց հետո, վերջինս սկսեց պարտաճանաչ պարապել դասերը…
Սակայն Մինասյանի նախնական փորձերը՝ առանց լսարան մտնելու աշխատավարձ ստանալ և աշխատանքային ստաժ գրանցել, որքան հասկանում եմ, հանգիստ չեն տվել ՇՊՀ-ի ռեկտորի ԺՊ Երվանդ Սերոբյանին… Քանի որ նրա դեմ հարուցվել է քրեական գործ ՀՀ քրեական օրենսգրքի 308-րդ հոդվածի 1-ին մասի հատկանիշներով և ընթանում է նախաքննություն, չեմ կարող հրապարակել ավելի շատ մանրամասներ պարոն Սերոբյանի կողմից թույլ տրված ենթադրյալ հանցագործության մասին… Միայն հավելեմ, որ անաչառ նախաքննության դեպքում կբացահայտվեն նաև պաշտոնեական կեղծիքի և բուհին բավականին մեծ ֆինանսական վնաս հասցնելու դեպքեր»,- գրել է Գագիկ Համբարյանը՝ հավելելով, որ որոշ ժամանակ առաջ Շիրակի մարզի դատախազ Կարեն Գաբրիելյանը միջնորդություն է ներկայացրել ԿԳՄՍ նախարար Արայիկ Հարությունյանին՝ Երվանդ Սերոբյանին մի այլ դրվագով կարգապահական տույժի ենթարկելու համար։
Նշենք, որ 2018թ-ի մայիսին ՇՊՀ ռեկտոր, նախկին հանրապետական Սահակ Մինասյանի հրաժարականից հետո, Երվանդ Սերոբյանը բուհի ռեկտորի ժամանակավոր պաշտոնակատարն է։
Այս տարվա մարտի 2-ին և մայիսի 11-ին էլ կայացավ ՇՊՀ ռեկտորի ընտրության երկու մրցույթ, որոնց արդյունքում բուհի նոր ռեկտոր այդպես էլ չընտրվեց։
Էմմա Չոբանյան
