Դատախազությունը բողոքարկել է Ռոբերտ Քոչարյանի և Արմեն Գևորգյանի իրավունքների խախտման վերաբերյալ դատարանի որոշումները

ՀՀ գլխավոր դատախազությունը բողոքարկել է Առաջին ատյանի դատարանի՝ Արմեն Գևորգյանի և Ռոբերտ Քոչարյանի գույքը կալանքի տակ առնելով` նրանց իրավունքները խախտելու մասին որոշումները։

Հիշեցնենք, որ այն բանից հետո, երբ պաշտպանական կողմերը միջնորդել էին վերացնել նախկին պաշտոնյաների գույքի վրա դրված կալանքը, դատարանը որոշեց մասնակի բավարարել միջնորդությունը։ Դատարանն արձանագրել էր, որ գույքը կալանքի տակ առնելով՝ վարույթն իրականացնող մարմինը խախտել է Արմեն Գևորգյանի և Ռոբերտ Քոչարյանի իրավունքը, բայց գույքը կալանքից չէր ազատել։

Դատախազությունն այս որոշումը չի բավարարել և վերջինս միջնորդել է ամբողջությամբ մերժել պաշտպանական կողմի միջնորդությունները։ Դատախազությունը դիմել է Վերաքննիչ դատարան՝ Առաջին ատյանի որոշումները բեկանելու պահանջով։

Հիշեցնենք, որ Արմեն Գևորգյանի գույքի վրա կալանք է դրվել «Մարտի 1-ի» գործով քննչական խմբի ղեկավար Հրաչ Մուշեղյանի կողմից՝ դեռևս 2018 թվականի օգոստոսի 21-ին։ Նա մեղադրվում է ՀՀ քրեական օրենսգրքի 38-300.1-ին հոդվածի 1-ին մասով, 311-րդ հոդվածի 4-րդ մասի 2-րդ կետով և 190-րդ հոդվածի 3-րդ մասի 1-ին կետով` ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար:

Ռոբերտ Քոչարյանի գույքի վրա կալանք էր դրվել 2018 թվականի հուլիսի 30-ին։ Նա մեղադրվում է ՀՀ քրեական օրենսգրքի 300.1-ին հոդվածի 1-ին մասով և 311-րդ հոդվածի 4-րդ մասի 2-րդ կետով` ՀՀ սահմանադրական կարգը տապալելու և առանձնապես խոշոր չափերով կաշառք ստանալու համար։

Լիլիթ Շաբոյան