05.01.2025 | 21:53
Մատուցվեց Սուրբ ծննդյան ճրագալույցի պատարագ․ ԼՈՒՍԱՆԿԱՐՆԵՐ
«Ռուսթավի 2»-ի լրագրողը ուղիղ եթերում հայհոյել է Պուտինին. ՀԸ-ի դեմ բողոքողները 3 պահանջ ունեն
Քաղաքականություն
08.07.2019 | 16:25
Թբիլիսիի պետական համալսարանի մի խումբ ուսանողներ գիշերը բողոքի ակցիա են անցկացրել «Ռուսթավի 2» հեռուստաընկերության շենքի մոտ՝ առաջ քաշելով 3 պահանջ. տեղեկացնում է aliq.ge-ն:
Նրանք դիմում են երկրի ՆԳ նախարարությանը՝ մուտք գործել հեռուստաընկերության շենք, հետաքննել տեղի ունեցածը՝ պարզելու, թե «ով է կանգնած հեղաշրջման փորձի հետևում»։
Ցուցարարների մյուս պահանջը՝ արգելել հեռուստաալիքի հեռարձակումը, հակառակ դեպքում բազմամարդ ակցիաներ կսկսվեն։
Մյուս հիմնական պահանջը՝ աշխատանքից հեռուստաալիքի ղեկավար Նիկա Գվարամիայի և «Պոստսկրիպտումի» հաղորդավար Գիորգի Գաբունիայի ազատումն է: Հիշեցնենք՝ հենց վերջինիս հայտարարությունն է բողոքի առիթ դարձել։ Գաբունիան ուղիղ եթերում հայհոյել է Ռուսաստանի Դաշնության նախագահ Վլադիմիր Պուտինին:
Ցուցարարները խոստացել էին ակցիան շարունակել ողջ գիշեր, սակայն, ժամը 04:00-ի սահմաններում ցրվել են:
Հիշեցնենք՝ «Ռուսթավի 2» ընդդիմադիր հեռուստաընկերության հաղորդավար Գիորգի Գաբունիան իր հեղինակային հաղորդումն սկսել էր ռուսերենով, բացման խոսքում հայհոյելով ՌԴ նախագահ Վլադիմիր Պուտինին։ Այս ամենը մեծ աղմուկ է բարձրացրել, հայտարարություններ են տարածել արտաքին ու ներքին գործերի նախարարությունները, Վրաստանի պատրիարքարանը, խնդրին անդրադարձել է նաև վարչապետ Մամուկա Բախտաձեն և նախագահ Սալոմե Զուրաբիշվիլին:
Հայտարարությունից հետո մի խումբ քաղաքացիներ բողոքի ցույց են սկսել հեռուստաընկերության շենքի առջև՝ պահանջելով դադարեցնել հեռարձակումը, ինչպես նաև Գաբունիայի և «Ռուսթավի 2»-ի ղեկավար Նիկա Գվարամիայի հրաժարականը՝ վերջիններիս կոչ անելով նաև հեռանալ երկրից:
Հարկ է նշել նաև, որ Նիկա Գվարամիան Գաբունիայի հայհոյանքներից հետո եթերում ներողություն էր խնդրել՝ նշելով, որ «Ռուսթավի 2»-ի համար կարևոր են Վրաստանի ազգային շահերը, ըստ նրա, «սխալ էր ոչ թե Գաբունիայի միտքը, այլ արտահայտման ձևը, որը եթերային չէր»։ Գվարամիան ակցիայի ֆոնին դիմելով ՆԳՆ-ին՝ խնդրել էր ապահովել հեռուստաալիքի անվտանգությունը:
ՆԳ նախարարությունն իր հերթին տարածած հայտարարությունում շեշտել էր, որ իրավապահ մարմինների ներկայացուցիչները գտնվում են տեղում, ՆԳՆ-ն ապահովում է հեռուստաալիքի անվտանգությունը:
Տարածած հայտարարություններում խոսվում է երկրում ապակայունության փորձերի մասին: «Ռուսթավի 2»-ի հնչած հայտարարությունները, ըստ ԱԳՆ-ի, որևէ առընչություն չունեն խոսքի ազատության հետ, դրանք սադրանք են ռուս-վրացական առանց այդ էլ լարված հարաբերություններում: Պատրիարքարանը ևս դատապարտել է հեռուստաընկերության կողմից ապակայունացման փորձը։
Հարցին անդրադարձել է նաև Վրաստանի երրորդ նախագահ Միխեիլ Սաակաշվիլին: Նա նշել է, որ օկուպացիայի դեմ պայքարում վրացական լրատվամիջոցները չպետք է նմանվեն հիստերիկ ռուսական լրատվամիջոցներին:
