23.05.2026 | 11:24
Անդրանիկ Թևանյանը ձերբակալվել է
Սահմանադրական կարգը խաթարելուն ուղղված ոտնձգությունները կարժանանան համարժեք իրավական գնահատականի. Արցախի ԱԱԾ
Քաղաքականություն
08.07.2019 | 15:01
Արցախի Ազգային անվտանգության ծառայությունն այսօր հայտարարություն է տարածել՝ համապետական ընտրություններից առաջ երկրի քաղաքական ուժերին ու գործիչներին հորդորելով գործել բացառապես օրենսդրության շրջանակում: Այս մասին տեղեկանում ենք ԱՀ ԱԱԾ պաշտոնական կայքից:
«Հաշվի առնելով, որ Արցախի Հանրապետությունում 2020թ. սպասվում են կարևորագույն քաղաքական և հասարակական իրադարձություններ՝ ԱՀ Նախագահական և Խորհրդարանական ընտրությունները, Ազգային անվտանգության ծառայությունը անհրաժեշտ է համարում հորդորել քաղաքական ուժերին և քաղաքական գործընթացներում ներգրավված առանձին անձանց՝ իրենց գործունեությունը կազմակերպել բացառապես ԱՀ Սահմանադրության և օրենքների պահանջներին համապատասխան:
Արցախի Հանրապետության տեղեկատվական որոշ տիրույթներում արդեն իսկ այսօր տեղ գտած մի շարք բացասական երևույթներ, ինչպիսիք են բռնության, սպառնալիքների կոչերը, վարկաբեկիչ նյութերի տարածումը, քաղաքական տարբեր հայացքներ ունեցող բնակչության որոշ խմբերի միջև ատելության, թշնամանքի և անհանդուրժողականության մթնոլորտ են ձևավորում, ինչն իր հերթին կարող է սպառնալիք դառնալ Արցախի Հանրապետության անվտանգությանը:
ԱՀ Ազգային անվտանգության ծառայությունը իրազեկում է, որ սահմանադրական կարգը խաթարելուն ուղղված բոլոր ոտնձգությունները կարժանանան համարժեք իրավական գնահատականի և դրանք կանխարգելելու համար կձեռնարկվեն բոլոր համապատասխան միջոցառումները»,- ասված է ԱՀ ԱԱԾ հայտարարությունում:
