Ձեր նշած սուբյեկտը կրթության փորձագետ չէ. ԿԳ փոխնախարարը՝ Անահիտ Բախշյանի մասին

«Այդպիսի ավագանու անդամ ճանաչում եմ, բայց կրթության ոլորտի փորձագետ չեմ ճանաչում»,- լրագրողների հետ զրույցում հայտարարեց ՀՀ ԿԳ փոխնախարար Վահրամ Մկրտչյանը՝ անդրադառնալով Երևանի ավագանու «Ելք» խմբակցության անդամ Անահիտ Բախշյանի նախաձեռնությանը, որով վերջինս պահանջում է նախարար Լևոն Մկրտչանի հրաժարականը։

«Այդ սուբյեկտը վերջերս ազատվեց կրթության ազգային ինստիտուտի փոխտնօրենի պաշտոնից », – շարունակեց փոխնախարարը՝ վստահեցնելով, որ նախարարությունում այդ նախաձեռնությունից մտահոգ չեն:

Հիշեցնենք՝ Անահիտ Բախշյանը ԿԳ նախարար Լևոն Մկրտչյանի հրաժարականը պահանջում է նախագահ Սերժ Սարգսյանի կողմից Հրազդանի քաղաքապետի անչափահաս որդուն առաջադիմության համար ոսկե մեդալ շնորհելուց հետո ծավալված քննադատությունների ֆոնին:

Նախարարը հայտարարել էր, որ Ռազմիկ Դանիելյանին չպարգևատրելու հիմքեր չկային:

«Եթե մարդը ավտովթարի է ենթարկել ինչ-որ մեկին ու, ցավոք սրտի, ամեն ինչ դժբախտ ելքով է ավարտվել, դա ոչ մի կապ չունի նրա գիտելիքների հետ։ Նրան այդ մեդալը շնորհել են իր գիտելիքների համար, իսկ այդ դեպքի հետ կապված կա նախաքննություն, որը կպարզի մանրամասները», – նախարարի հիմնավորումներն արդարացրեց փոխնախարար Վահրամ Մկրտչյանը:

Լրագրողներից մեկը հետաքրքրվեց՝ այդ դեպքում ինչու չեն ապահովում նաև կալանքի տակ գտնվող «Սասնա ծռեր» խմբի անդամ Արամ Մանուկյանի՝ կրթություն ստանալու իրավունքը:

«Արամ Մանուկյանի դեպքով մենք բազմաթիվ նամակներ ենք ստացել, որ նա ցանկանում է հեռավար կարգով շարունակել իր ուսումը, ես անձամբ զբաղվել եմ այդ գործով: Օրենքի հետ կապված խնդիր ունենք, նա կարող է ուսում ստանալ, եթե բուհում և քրեակատարողական հիմնարկում կան համապատասխան պայմաններ: Եթե նման պայմաններ չկան, ապա Արամ Մանուկյանը չի կարող վերականգնվել և ուսումը շարունակել», – ասաց Վահրամ Մկրտչյանը:

Մանրամասները՝ տեսանյութում:

Շողիկ Գալստյան