Հասարակություն
28.06.2019 | 12:38
EcoNews.am բնապահպանական տեղեկատվական կայքը «Animal lovers կենդանասերներ» նախաձեռնության հետ համատեղ, շարունակում է ներկայացնել ապօրինի որսի, կենդանիների նկատմամբ դաժան վերաբերմունքի մասին վկայող լուսանկարներ եւ այլ մանրամասներ, հաղորդում է Econews.am-ը:
Այս անգամ եւս համացանցային բաց տվյալների ուսումնասիրության արդյունքում արձանագրել ենք ապօրինի որսի մասին վկայող լուսանկարներ։ Գեւորգ Ավետյան եւ Արամ Ջուլհակյան անունով օգտատերերի 2016թ․-ին բեռնված լուսանկարում սպանված այծյամ է (Capreolus capreolus)։ Կենդանատեսակը գրանցված չէ ՀՀ կենդանիների կարմիր գրքում, սակայն որսատեսակ չի հանդիսանում եւ այծյամի որսը թույլատրված չէ տարիներ շարունակ։
Ուսումնասիրելով նշված քաղաքացիների կողմից բեռնված լուսանկարները, հանդիպում ենք ապօրինի որսի մասին վկայող մի շարք լուսանկարների։
Այս տարվա ապրիլ ամսին Արամ Ջուլհակյան անունով քաղաքացին սոցիալական ազատ հարթակ է բեռնել լուսանկար հավանաբար սպանված կենդանու հետ։ Լուսանկարում գիշատիչ կատվազգի է՝ լուսան (Lynx), որի որսը եւս թույլատրված չէ, սակայն վերջինս ընդգրկված չէ ՀՀ կենդանիների կարմիր գրքում։ «Որսահանդակներում որսի կենդանիների 2018-2019 թվականների սիրողական որսի համար թույլատրելի չափաքանակները եւ որսի ժամկետները սահմանելու մասին» հրամանի համաձայն՝ լուսանը եւս չի հանդիսանում թույլատրելի որսատեսակ։
Ընդգծենք, որ հավանաբար սպանված կենդանու հետ լուսանկարում նաեւ մանկահասակ երեխաներ են, ինչը եւս խոսում է քաղաքացու բարոյական նկարագրի մասին, իսկ էկո-կրթական եւ երեխայի բնության հետ ծանոթացման տեսանկյունից նման երեւույթն անընդունելի է։
Նշված քաղաքացին ապօրինի որսի մասին վկայող այլ լուսանկարներ էլ է բեռնել։ Այս տարվա փետրվար ամսին Արամ Ջուլհակյանը լուսանկար է բեռնել նաեւ սպանված գորշուկի (Meles meles) հետ: Նշենք, որ լուսանկարներում նշված անձինք պարբերաբար երեւում են որսորդական հրազենը ձեռքին եւ համապատասխան համազգեստով։ Գորշուկը կզաքիսների ընտանիքի գիշատիչ կաթնասուն կենդանի է։ Սովորական գորշուկը տարածված է Եվրասիայում, Հայաստանում տարածված է գրեթե բոլոր մարզերում։ Բնակվում է գետնափոր բներում, որոնք փորում է քարակույտերում, ժայռերի, ձորերի լանջերի թեքություններում, բաց տարածություններում, անտառներում եւ այլ վայրերում։ Կենդանատեսակը եւս ընդգրկված չէ ԿԳ-ում, սակայն որսը թույլատրված չէ եւ չի հանդիսանում որսատեսակ։
2018թ․-ի փետրվար ամսին Արամ Ջուլհակյանը բեռնել է նաեւ սպանված նապաստակի հետ լուսանկար կրկին որսորդական հրազենով։ Նշենք, որ արդեն մի քանի տարի է, ինչ վերոնշյալ հրամանով չի թույլատրվում նաեւ նապաստակի որս։
Հայտնենք, որ նշված երկու քաղաքացիները հանդիսանում են Լոռվա մարզի բնակիչներ։ Արամ Ջուլհակյան անունով քաղաքացին բնակվում է Վանաձոր քաղաքում, իսկ Գեւորգ Ավետյանը՝ Գուգարք գյուղում։
Ըստ EcoNews.am-ի կողմից կատարված ուսումնասիրության՝ ՀՀ որսի ոլորտի նկատմամբ եւս բացակայում է պատշաճ մակարդակի վերահսկողություն, իսկ որսորդական միասնական վկայական ստանալու կարգի ոչ լիարժեքության, «Որսի եւ որսորդական տնտեսության վարման մասին» ՀՀ օրենքով սահմանվող որսորդական մինիմում հանձնելու պրակտիկայի ի սպառ բացակայության, մի շարք այլ ընթացակարգային խնդիրների հետեւանքով ոլորտում ստեղծվել է քաոսային իրավիճակ, ինչի պատասխանատուն առաջին հերթին պետական լիազոր մարմինն է, որը գրեթե 10 տարի շարունակ պատշաճ կերպով չի իրականացրել իր լիազորություններն ու պարտականությունները։
