Բաքուն չի կարողանա Արցախում օդանավեր խոցել. ԱՄՆ կոնգրեսականն օրենսդրական փոփոխություն է առաջարկել

Ամերիկացի կոնգրեսական Բրեդ Շերմանն առաջարկել է ԱՄՆ «Պետական պաշտպանության մասին» օրենքի մեջ փոփոխություններ կատարել և արգելել Ադրբեջանին վաճառել ամերիկյան զինամթերք, որը կարող է Արցախի քաղաքացիական ավիացիայի դեմ կիրառվել: Այս մասին տեղեկանում ենք ԱՄՆ Հայ դատի հանձնախմբի կայքից:

Օրենսդրական նախաձեռնությունն ուղղված է Ադրբեջանի իշխանությունների գործունեության սահմանափակմանը, որը շարունակ սպառնում է Ստեփանակերտին՝ խոցել Արցախի տարածքում գտնվող քաղաքացիական օդանավերը:

«Չպետք է թույլ տալ, որ Ադրբեջանն իր հարևաններին վախեցնի։ Ադրբեջանական օդուժին որևէ կերպ աջակցելը վերջին բանն է, որ մենք պետք է անենք»,- ընդգծել է կոնգրեսականը:

Օրենսդրական փոփոխությունն ուղարկվել է ԱՄՆ Ներկայացուցիչների պալատի ներքին կանոնակարգման հարցերի հանձնաժողով: Ուսումնասիրությունից հետո այն Կոնգրեսի ստորին պալատ կներկայացվի։

ԱՄՆ Հայ դատի Վաշինգտոնի գրասենյակի գործադիր տնօրեն Արամ Համբարյանը, անդրադառնալով կոնգրեսական Շերմանի հայտարարությանը, նշել է, որ այս փոփոխությունն Ադրբեջանին ուղղված ազդանշան կլինի:

«Այս փոփոխությունն Ադրբեջանին համար ազդանշան կլինի այն մասին, որ ԱՄՆ-ն անվերապահորեն դեմ է քաղաքացիական օդանավերի ոչնչացման ցանկացած սպառնալիքի: ԱՄՆ հարկատուների կողմից ֆինանսավորվող պաշտպանական հոդվածները երբևէ չպետք է կիրառվեն մի ազգի կողմից, որը գրեթե սպառնում է օգտագործել իր օդային հնարավորություններն անմեղ ուղևորներին սպանելու համար»,- ասել է Արամ Համբարյանը։

Նելլի Մելքոնյան