Ոճիրը չի մաքրվի, փաստաբանն ինչքան էլ վճարվի. Քոչարյանի գործով տուժող

ՀՀ Վերաքննիչ քրեական դատարանում շարունակվում է երկրորդ նախագահ Ռոբերտ Քոչարյանի և մյուսների գործով մեղադրող կողմի բողոքների քննությունը։

Այսօրվա նիստին նախատեսվում է լսել պաշտպանական կողմի առարկությունները բողոքների վերաբերյալ։

Մինչ պաշտպաններին լսելը կարճ հայտարարություններ արեցին գործով տուժող ճանաչված Սուրեն Գևորգյանն ու Անդրանիկ Հարությունյանը։ Տուժող Սուրեն Գևորգյանը հայտարարեց, որ իր ամբողջ ընտանիքը 2008-ից հետո հեռացել է Հայաստանից․ « Ինձ էս օրը գցողը, ոչնչացնողը պետք ա ստանա արժանի պատիժ, ընտանիքս ոչնչացել ա, մենակ ես եմ մնացել։ Ես մնացի մենակ․ 2008-ից իմ ցեղը փախավ Հայաստանից, միայն ես եմ մնացել։ Դատարանից խնդրում եմ արդար դատավարություն, ոճրագործը պետք է պատասխան տա։ Ես Հայաստանում ստրուկ եմ ապրել, իրավազուրկ, մենակ վերևում Աստված գիտի։ Նա ոչնչացրեց իմ ընտանիքը, անկախություն եմ ցանկացել, սա՞ էր իմ անկախությունը, ես մրմռում եմ։ Ինձ ջնջխված բերին տուն, գցին, կինս տեսավ, շաքար ստացավ։ Ահա էս էր իրավունք պահանջելու իմ վերջակետը, ես իմ իրավունքն էի պահանջում հայրենիքից, ընտանիքս ջնջվեց, մնացի միայնակ։ Ես Աստծուց միայն մեր ազգին փրկություն եմ խնդրում, նույն բանսարկուները ստեղ են՝ Մարտի 1-ի։ Հայաստանում գտնենք արդարադատություն, բայց մարդու խիղճը, հային Հայաստանում ոչնչացնե՞ն, ինչի՞ գա ինձ ոչնչացնի, ի՞նչ էի արել։ Ինձ ոտի տակ են գցում, պարոն դատավոր, մի քիչ էլ խղճի կողմից։ Ոճիրն արդարացում չունի, ինչ ձևի փաստաբան լինի, ինչ ձևի վճարվի։ Իմ հոգին խռոված է իմ երկրում։ Իմ էրեխեն Ռոբերտ Քոչարյանի թագավորությունից ա փախել։ Նրան արժանի պատիժ»,- ասաց Գևորգյանը։

Գործով մյուս տուժող Անդրանիկ Հարությունյանն էլ նշեց, որ 2008 թվականի մարտի 1-ին դպրոցական երեխա է եղել, անցել է այդ ժամանակ փողոցով, կրակել են, ինչի հետևանքով մեկ աչքը կուրացել է։

Լիլիթ Շաբոյան