Ժամանակն է, որ այդ հարցերը ուղիղ, առանց սեթևեթանքի դնենք օրակարգում և քննարկենք․ Նիկոլ Փաշինյան. ՏԵՍԱՆՅՈՒԹ

«Յուրաքանչյուր հայ էմոցիոնալ կապ ունի «Հայաստան» համահայկական հիմնադրամի հետ և թերևս այդ կապը արձանագրելու համար հարկավոր է անցնել Հայաստանը Արցախին միացնող ճանապարհներով և այդ ճանապարհներին տեսնելով «Հայաստան» համահայկական հիմնադրամի խորհրդանիշները, հասկանալով, որ այդ ամենը հիմնադրամի ջանքերով է կառուցվել, նաև՝ բազմաթիվ դպրոցներ, մանկապարտեզներ, ջրատարներ, որպեսզի հասկանալի լինի, թե կարևոր ինչ առաքելություն է իրականացրել Երրորդ Հանրապետության, Արցախի կյանքում՝ ամենադժվար պահերին սատար լինելով»,- «Հայաստան» համահայկական հիմնադրամի տարեկան ժողովում հայտարարեց վարչապետ Նիկոլ Փաշինյանը։

Ըստ նրա՝ նոր ժամանակներում կարիք կա նորովի գնահատել «Հայաստան» համահայկական հիմնադրամի աշխատանքները և տեսնել նաև մեդալի հակառակ կողմը։ Բացասական ի՞նչ ազդեցություն են ունեցել «Հայաստան» համահայկական հիմնադրամի գործունեության որոշակի դրվագները հայկական ներուժի, իմիջի վրա, հարց բարձրացրեց վարչապետը, նշելով՝ ամեն տարի արձանագրվում է, որ հանգանակվել է 15, 10, 20, 25 միլիոն դոլար:

«Բայց եկեք հասկանանք՝ ինչպե՞ս է դա երևում կողքից՝ դրսից։ Ուրիշների համար հարց է ծագում՝ սա՞ է համահայկական ներուժը, դա այն է, որ ամբողջ աշխարհում հավաքվում է 15 միլիոն դոլար և դրանով ուրախանում։ Ուզում եմ ընդգծել, որ հայկական ներուժի դեմ ձեզ և մեզ հայտնի ուժերը տարեկան միլիարդավոր դոլարներ են ծախսում, որպեսզի հայկական ազդեցությունը ամբողջ աշխարհում նվազեցնեն։ Գալիս է պահ, որ մենք ինքներս երբեմն այդ պրոցեսին ակամա շատ ավելի մեծ աշխատանք ենք անում, քան անում են հակառակորդները։ Ժամանակն է, որ այդ հարցերը ուղիղ, առանց սեթևեթանքի դնենք օրակարգում և քննարկենք»,- նշեց վարչապետը։

Մանրամասները՝ տեսանյութում:

Ռոբերտ Անանյան