19.12.2025 | 15:02
Մեկնարկել է Աղազարյանի գործով դատավարությունը
Հրատապ. Քոչարյանի պաշտպանն ահազանգում է դատարարանի վրա ճնշում գործադրելու մասին
Հասարակություն
18.05.2019 | 12:10
Այսօր դատարանը պետք է հրապարակի ՀՀ երկրորդ նախագահ Ռոբերտ Քոչարյանի նկատմամբ խափանման միջոցի մասով իր որոշումը։
Այս որոշման հրապարակումից առաջ Աժ Իմ քայլը խմբակցության պատգամավոր Հայկ Սարգսյանը ֆեյսբուքում գրառում է կատարել՝ կոչ անելով ժողովրդին հավաքվել դատարանի բակում․
« Սիրելի հայրենակիցներ, տեղեկություններ կան, որ Ռոբերտ Քոչարյանի դատավորը ենթարկվում է ճնշումների և այսօր ցանկանում է փոխել նրա խափանման միջոցը: Չի կարելի թույլ տալ, որ Երևան քաղաքը տանկերով գրաված, 10 քաղաքացիների կյանք խլած, հազարավոր մարդկանց ճակատագրեր խեղած մարդուն ազատ արձակեն Ղարաբաղի 2 նախագահների երաշխավորությամբ և 20-30 աջակիցների կողմից դատարանի բակում «Ազատություն հերոսին» ակցիաների ճնշման տակ: Միմիայն ժողովրդի ստվար զանգվածը, նրա ահագնացող ցասումը և պատժի անխուսափելիությունը կստիպեն դատավորին արդար որոշում կայացնել: Այսօր ժամը 13:00 բոլորս դեպքի Նոր Նորքի դատարան»,- նշված է գրառման մեջ։
Այս կապակցությամբ քիչ առաջ հրատապ ասուլիս է հրավիրել Քոչարյանի պաշտպանական խմբի անդամ, փաստաբան Հայկ Ալումյանը՝ հայտարարելով, որ նման բովանդակությամբ գրառումը իշխանության ներկայացուցիչ հանդիսացող Աժ պատգամավորի կողմից ուղղակիորեն ճնշում է դատարանի վրա, ավելին, ըստ նրա՝ դա երկրի սահմանադրական կարգը տապալելուն ուղղված գործողություն է։ Ալումյանը կոչով է դիմել երկրի նախագահ Արմեն Սարգսյանին՝ թույլ չտալ, որպեսզի իր ձեւակերպմամբ՝ տապալվի երկրի սահմանադրական կարգը եւ ճնշում գործադրվի դատարանի վրա, նա դիմել է երկրի գլխավոր դատախազին, նաեւ՝ Ոստիկանությանը՝ կոչ անելով թույլ չտալ, որպեսզի Հայկ Սարգսյանի կոչով դատարանի բակում ժողովրդի հավաքը կայանա։ Ալումյանը նաեւ դիմել է ԲԴԽ ղեկավար Գագիկ Հարությունյանին, որպեսզի վերջինս զերծ պահի դատավորին ճնշումներից, ինչպես նաեւ վարչապետ Նիկոլ Փաշինյանին՝ ասելով, որ Աժ պատգամավոր Հայկ Սարգսյանը չէր կարող առանց վարչապետի իմացության նման կոչով հանդես գալ։
Եվ վերջապես փաստաբանը դիմել է բոլոր իրավապաշտպաններին՝ հայտարարելով, որ Հայաստանում վերջին մեկ տարվա ընթացոքում բռնաճնշումները դատարանների վրա ահագնացել են, եւ նրանք պետք է իրենց ձայնը բարձրացնեն՝ դատարանի վրա նման ուղղակի ճնշում գործադրելու հնարավորությունը բացառելու համար։
