25.04.2026 | 18:26
Գազայի հատվածում անցկացվում են առաջին ընտրությունները 2006 թվականից ի վեր
Yandex տաքսի ծառայության ներկայացուցիչները հանդիպեցին գործադուլ անող վանաձորցի վարորդներին
Տնտեսություն
16.05.2019 | 22:22
Այսօր Yandex տաքսի ծառայության վանաձորցի վարորդները շարունակում էին բողոքի ակցիան՝ պահանջելով ծառայության մինիմալ գումարը 200 դրամից դարձնել 300 դրամ:
Yandex տաքսիի գործընկերների հետ համագործակցության մասով մենեջեր Արթուր Մարտիկյանը Factor.am-ի հետ զրույցում ասաց, որ իրենք տեղյակ են վարորդների կողմից բարձրացված խնդրի մասին:
Նա նշեց, որ ընկերությունը վարորդներին չի հրահանգել դադարեցնել համագործակցությունը.
«Երեկ երեկոյան լուրերում թյուր կարծիք եղավ, որ Yandex տաքսի ծառայության ղեկավարությունն ասել է՝ ինչ ուզում եք արեք, ծրագրերն անջատեք ու մի վարեք: Մենք վարորդներին ոչինչ չենք ասել, ես չգիտեմ՝ իրենց ով է ինչ ասել, բայց մեզնից այստեղ ներկայացուցիչ չի եղել»:
Վարորդների հետ հանդիպումից հետո Մարտիկյանն ասաց, որ հարցը Երևանում կքննարկեն գործընկերների հետ: Մի քանի օրից կրկին կհանդիպեն և հստակ պատասխան կասեն. «Մենք եկել ենք այստեղ, որպեսզի լսենք մեր վարորդներին, և գնանք Երևանում իրենց խնդիրներին տանք համապատասխան լուծում: Հիմա հստակ պատասխան չեմ կարող տալ, որովհետև սա բիզնես է, և բիզնեսը շարժվում է իր օրենքներով: Ամեն տարածաշրջանում, որտեղ մենք աշխատում ենք, կան գնային տարբերություններ: Գյումրիում, Վանաձորում և Ստեփանավանում 200 դրամ է»,- եզրափակեց նա:
Հիշեցնենք, որ Factor.am-ը երեկ անդրադարձել էր Վանաձորում տիրող իրավիճակին և ներկայացրել խնդրի վերաբերյալ վարորդների տեսակետը:
Տաթևիկ Ղազարյան
