09.10.2026 | 18:50
ՔՊ-ականներ, նախկին ՀՀԿ-ականներ ու անկուսակցականներ․ Լոռու համայնքապետերի քաղաքական ուղին
Մեղադրանքում նշված «որոշ անձանցից» մեկը նախկին պատգամավոր Լևոն Սարգսյանն է. գլխավոր դատախազի պարզաբանումը. ՏԵՍԱՆՅՈՒԹ
Հասարակություն
16.05.2019 | 21:08
Ռոբերտ Քոչարյանի գործով դատավարության ընթացքում պաշտպանական կողմը նախօրեին նշել էր, որ մեղադրանքում ձևակերպում կա՝ «Ռոբերտ Քոչարյանը, Սերժ Սարգսյանը և որոշ անձինք…»: Այսօր լրագրողները ՀՀ գլխավոր դատախազ Արթուր Դավթյանից հետաքրքրվեցին՝ ում մասին է խոսքը:
«Ձեր նկարագրած դրվագին առնչվում է, օրինակ, ԱԺ նախկին պատգամավոր Լևոն Սարգսյանը (հայտնի «ալրաղացի Լյովիկ» անունով – խմբ.)»,- ասաց Արթուր Դավթյանը՝ հաստատելով, որ խոսքը թիկնազորին համազգեստ բաժանելու դրվագի մասին է:
Այս գործով, սակայն, Լևոն Սարգսյանը դեռևս կարգավիճակ չունի: «Նա կարգավիճակ ունի, ներկայում գտնվում է հետախուզման մեջ, խափանման միջոցը՝ կալանք, բայց մեկ այլ քրեական գործով: Այս քրեական գործով նրա արարքին դեռևս իրավական գնահատական տրված չէ»,- ասաց գլխավոր դատախազը:
Դատարանի դահլիճում ելույթի ժամանակ ոչ պետական միջոցներից զինվորներին 120 մլն դրամ բաժանելու մասին հարցին ի պատասխան էլ Արթուր Դավթյանն ասաց, որ առայժմ ավելին ասել չի կարող. «Կոնկրետ ի՞նչ աղբյուրներով են այդ գումարները ձևավորվել՝ դրա վերաբերյալ հրապարակման ենթակա նյութ չունենք: Բայց դրանք ակնհայտորեն ոչ պետական միջոցներ են, և դուք լսեցիք, թե ինչ նպատակի են ծառայել»:
Մանրամասները՝ տեսանյութում:
Լիլիթ Շաբոյան
