Հասարակություն
10.05.2019 | 17:17Factor.am-ի հարցազրույցը ՀՀ Ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի հետ
– Պարո՛ն Քոչարյան, վարչապետ Նիկոլ Փաշինյանը մամուլի ասուլիսի ժամանակ հայտարարեց, որ ԱԱԾ-ում որոշ փաստաթղթեր են ոչնչացվել, իսկ ավելի ուշ ԱԺ-ում ասաց, որ այդ փաստաթղթերը պարզապես չկան: Ինչո՞վ եք բացատրում այն փաստը, որ ԱԱԾ–ից փաստաթղթերի անհետացման մասին հայտնի է դարձել մեկ տարի առաջ՝ անցած ամռանը, ինչպես երեկ հայտարարեց Արթուր Վանեցյանը, սակայն այդ մասին հանրությանը տեղեկացվեց միայն երկու օր առաջ:
– Հայաստանում տեղի են ունեցել փոփոխություններ և, բնականաբար, մեր ուժային կառույցներն օգտագործվել են շատ ապօրինի գործողությունների ընթացքում: Ես ենթադրում եմ, որ օգտագործվել է նաև ԱԱԾ-ն: Հիշեցնեմ, որ 1990-ականներին էլ տեղի ունեցավ քաղաքական իշխանության փոփոխություն և պարզվեց, որ այն ժամանակվա ԿԳԲ-ի արխիվներից փաստաթղթեր են անհետացել: Դրանք այն նյութերն էին, որոնք անհանգստացնում էին կոնկրետ անձանց, ովքեր ապօրինի հրամաններ էին իջեցրել և չէին ուզենա, որ այդ փաստերը հետագայում ի հայտ գան: Նույնն էլ, ենթադրում եմ, հիմա: Նշանակում է՝ եղել են այնպիսի փաստաթղթեր, որոնք ինչ-որ մարդիկ ցանկացել են օր առաջ կառույցից դուրս հանել, որովհետև դրանց գոյությունը շատ բան կապացուցեր, ինչը տեղի է ունեցել այդ կառույցի հետ: Փաստաթղթերը վերականգնելն ընդամենը տեխնիկայի և ժամանակի խնդիր է: Դրանով է պայմանավորված, որ ԱԱԾ տնօրենն ու վարչապետն ասում են, որ այդ փաստաթղթերը տեղում չեն: Ես ենթադրում եմ, որ դրանք շատ կարևոր փաստաթղթեր են, որոնց հիմքում պետք է ունենան շատ կարևոր բաների բացահայտումներ:
– Մասնավորապես՝ ի՞նչ:
– Կարող են Մարտի 1-ին առնչվող բաներ լինել, որովհետև երբ Հայաստանում տեղի ունեցավ քաղաքական իշխանափոխություն, ես ասացի, որ այդ օրերի վերաբերյալ բոլոր տեղեկությունները կրել են ներքին գործերը, ԱԱԾ-ն և մի քանի կառույցներ:
– Ըստ Ձեզ՝ ինչո՞ւ անցած մեկ տարվա ընթացքում ծառայողական քննություն չի իրականացվել: Վանեցյանը մեզ հետ զրույցում ասաց, որ դեռ նոր են սկսել ծառայողական քննություն, այն ընթացքի մեջ է և դեռ պիտի պարզեն՝ որքանո՞վ են անհետացած փաստաթղթերը կարևոր և արդյո՞ք քրեական գործ հարուցելու հիմքեր կան:
– Նախ՝ պարոն Վանեցյանին էլ ժամանակ էր պետք, որ իմանար այդ հսկայական կառույցում որտեղ ինչ կա: Դա ժամանակատար պրոցես է, և այդ գործընթացը գուցե հիմա տվեց հնարավորություն, որ որոշ բաներ հասանելի լինի նաև անվտանգության պետին: Այնտեղ նախկին իշխանություններից մնացած մարդիկ կային, որոնք նշանակված էին այն բանի համար, որ Սերժ Սարգսյանի բարեկամն են, և նրանք ինչ հանձնարարություն են կատարել, դժվար է ասել:
– Մեր հարցին ի պատասխան՝ Արթուր Վանեցյանն ասաց, որ Կուտոյանին՝ ԱԱԾ նախկին տնօրենին, հարցաքննելու անհրաժեշտություն չեն տեսնում։ Ինչպե՞ս եք սա մեկնաբանում:
– Պարոն Վանեցյանը տվել է հատուկ ծառայությունների ղեկավարին բնորոշ պատասխան: Հրաշալի պատասխան է տվել Ձեզ: Թե ինչ կլինի հետագայում, կիմանանք նախաքննական մարմիններից, եթե անհրաժեշտ լինի:
– Դուք ինչ եք կարծում՝ պե՞տք է հարցաքննել Գեորգի Կուտոյանին:
– Ես դժվարանում եմ ասել, թե ինչ պրոցես է գնում: Դրա մասին պետք է իմանալ վերջում, երբ գործընթացն ավարտված է:
– Իսկ հնարավո՞ր է, այսպես կոչված, կոմպրոմատների, դոսյեների մասին լինի խոսքը՝ տարբեր քաղաքական գործիչների հետ կապված: Նախկինում բազմիցս ասվել է, որ նախկին իշխանությունները, մասնավորապես՝ Սերժ Սարգսյանը, նման կոմպրոմատների թղթապանակներով են քաղաքական գործընթացների վրա վերահսկողությունը պահել:
– Դուք չեք հիշում, որ հեղափոխության վերջնական փուլի ընթացքում և այն օրը, որ Նիկոլ Փաշինյանը պետք է ընտրվեր վարչապետ, համացանցում կադրեր հայտնվեցին, որ նախագահականից հանում էին ինչ-որ թղթեր, և կասկածներ կար, որ դրանք հենց արխիվային թղթեր էին: Դա նույնպես պետք է ուսումնասիրվեր: Ես չեմ բացառում, որովհետև դոսյեներ եղել են, դոսյեներով են մարդկանց հետ հարաբերվել: Դոսյեներից բացի՝ եղել են դոսյեների ապահովումն ապահովող ապացույցներ: Դրանք բոլորը կրել են ապօրինի բնույթ:
Հարցազրույցն ամբողջությամբ՝ տեսանյութում:
Նարեկ Կիրակոսյան
