24.11.2024 | 21:56
Միակն ու անկրկնելին. ՀՀ-ում Ֆրանսիայի դեսպանի արձագանքը՝ Ադրբեջանի տարածքային պահանջներին
Առանց հստակ պատճառաբանության դատական գործերի քննության հետաձգումների առնչությամբ վարչապետը հանձնարարական տվեց
Տնտեսություն
31.08.2017 | 12:11
ՀՀ Կառավարության այսօրվա նիստում վարչապետ Կարեն Կարապետյանը անդրադարձավ դատական համակարգում առկա խնդիրներին` հնչեցնելով համապատասխան հանձնարարականներ:
Կառավարության ղեկավարի հանձնարականը մասնավորապես վերաբերում էր դատական գործերի բաշխման ընթացակարգերի արդյունավետության բարձրացմանը և դատական գործերի քննության տևողության կրճատմանը:
«Դատական գործերի քննության տևողության խնդրին մեր կողմից անդրադարձ էր կատարվել դեռևս հունիսի 29-ին և տրվել էր հանձնարարական դատարանների բեռնաթափմանն ուղղված լուծումներ ներկայացնելու վերաբերյալ: Արդարադատության նախարարը տեղեկացրել է այդ նպատակով համապատասխան օրենսդրական փաթեթի մշակման ընթացքի մասին՝ հայտնելով նաև, որ դրանք սահմանված ժամկետներում կներկայացվեն կառավարությանը: Միաժամանակ դատական գործերի քննության հետաձգման կապակցությամբ ձևավորված իրավակիրառական պրակտիկայի, ինչպես նաև դատավորների միջև գործերի բաշխվածության առկա իրավիճակի ուսումնասիրությունների արդյունքում վեր են հանվել օրենսդրական և գործնական որոշ խնդիրներ: Մասնավորապես մի կողմից դատական գործերի բաշխման գործող կարգավորումները թույլ են տալիս միևնույն դատարանի տարբեր դատավորների ծանրաբեռնել բավական անհամաչափ, իսկ մյուս կողմից՝ դատական գործերի քննության հետաձգումները տեղի են ունենում դատական լայն հայեցողության տիրույթում՝ շատ դեպքերում չունենալով հստակ անհրաժեշտ պատճառաբանություն»,- ասաց կառավարության ղեկավարը:
Հաշվի առնելով վերանշյալը՝ գործադիրի ղեկավարը Արդարադատության նախարարին հանձնարարեց երկամսյա ժամկետում ուսումնասիրել և կառավարության աշխատակազմ ներկայացնել դատական նիստերի հետաձգման պատճառաբանման ապահովման, դատավորների միջև դատական գործերի բաշխման ընթացակարգերի հայեցողության սահմանափակման և արդյունավետության բարձրացման, ինչպես նաև որոշակի գումարային շեմը գերազանցող քաղաքացիական գործերի լուծումը սեղմ ժամկետում ապահովող գործիքակազմի ներդրման ուղղված առաջարկություններ:
Շողիկ Գալստյան
