Մանվել Գրիգորյանի պաշտպանները Մնացական Մարտիրոսյանին ինքնաբացարկի միջնորդություն ներկայացրին

Դատավոր Մնացական Մարտիրոսյանի նախագահությամբ շարունակվում է ԱԺ նախկին պատգամավոր Մանվել Գրիգորյանի և նրա կնոջ՝ Նազիկ Ամիրյանի դեմ գործով նիստը: Մանվել Գրիգորյանի պաշտպաններից Լևոն Բաղդասարյանը ինքնաբացարկի միջնորդություն ներկայացրեց դատավորին՝ կողմնակալ լինելու կասկածներ ունենալու հիմքով:

«Մեր պաշտպանյալի մասնակցությունը նիստերին արգելելը թույլ է տալիս ենթադրել, որ այս գործով պատվեր է իջեցվել դատարանին, դատավորն ունի անաչառության խնդիր»,- ասաց Բաղդասարյանը:

Մեղադրող կողմը առարկեց ներկայացված միջնորդության դեմ: «Այն անհիմն է և ենթակա է մերժման»,- ասաց Վահե Դոլմազյանը:

Դատարանը հեռացավ խորհրդակցական սենյակ որոշում կայացնելու: Խորհրդակցական սենյակից վերադառնալով դատարանը հայտնեց, որ ինքնաբացարկի միջնորդությունը մերժեց անհիմն լինելու պատճառաբանությամբ:

Դատարանը կրկին հեռացավ խորհրդակցական սենյակ, այս անգամ կալանքի վերաբերյալ որոշում կայացնելու:

Հիշեցնենք՝ Մանվել Գրիգորյանը մեղադրվում է ապօրինի կերպով զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու համար:

Ըստ մեղադրանքի` Գրիգորյանը կնոջ, որդու և այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող տարածքներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր:

Լիլիթ Շաբոյան