Արդյոք Մանվել Գրիգորյանը կզրկվի՞ ԵԿՄ անդամ լինելուց․ Արա Կետիկյանը մանրամասնում է

Ունենք նոր նախագահ, նոր վարչություն և, բնականաբար, փոփոխություններ կլինեն, իսկ Սասուն Միքայելյանը դատարկաձեռն չի եկել, եկել է նոր և բազմաթիվ ծրագրերով, այդ թվում նաև կառուցվածքային որոշակի փոփոխություններով։

Այս մասին այսօր հրավիրված մամուլի ասուլիսի ժամանակ լրագրողների հետ զրույցում ասաց «Երկրապահ կամավորական միության» վարչության անդամ Արա Կետիկյանը։

Վերջինիս խոսքով՝ դեռ համագումարի օրվանից 184 հոգանոց վարչությունն արդեն փոխարինվել է 5 հոգանոց կազմով և շատ ավելի ճկուն է աշխատում ներկայիս վարչությունը, իսկ ԵԿՄ-ում փոփոխություններն այսքանով չեն ավարտվում։

«Վերից վար կառուցվածքային փոփոխություններ կլինեն, այդ թվում մենք նախատեսում ենք շատ լուրջ վերահաշվառում, եթե նախկինում դռները շատ բաց էին նաև ոչ կռված, ազատամարտը չանցած տղաների համար, քաղաքացիների համար, ինչը ուզում եմ հատուկ նշել ո՛չ օրենքի, ո՛չ  կանոնադրության խախտում չէր։ Սասուն Միքայելյանի և նորընտիր վարչության քաղաքականությունն այլ է՝ մաքսիմալ կկրճատվեն և հիմնական կորիզը ԵԿՄ-ի կմնան միայն պատերազմի մասնակից տղաները»,– ասաց Կետիկյանը։

Հարցին՝ իսկ ինչո՞վ էր պայմանավորված այն հանգամանքը, որ ԵԿՄ համագումարին վարչության ոչ բոլոր անդամներն էին ներկա, Կետիկյանը  պատասխանեց․ «Դեռ համագումարում ես ասացի, որ վարչության անդամներն իրավունք չունեն նեղանալու, որովհետև որևէ վարչության անդամ՝ այդ թվում ես, հրավիրատոմսով չենք եկել համագումար։ Բոլոր այն վարչության անդամները, ովքեր այս վերջին ամիսներին, հատկապես հայտնի իրադարձություններից հետո վերջին 8-9 ամսվա ընթացքում կապը պահել են երկրապահի հետ, ակտիվորեն աշխատել են մեզ հետ, բոլորն էլ ներկա էին համագումարին»։

Հարցին՝ արդյոք պատրաստվո՞ւմ են Մանվել Գրիգորյանին զրկել ԵԿՄ անդամ լինելուց, Կետիկյանը պատասխանեց․ «Սպասում ենք դատին։ Փառք Աստծո, այսօրվա իրականության պայմաններում դատարաններն անկախ են, իմ կարծիքով, որևէ ճնշում նրանց վրա չի կարող գործադրվել, բոլոր հարցերի պատասխանները կտա դատարանը»։

Աղավնի Սուքիասյան