Գիտության ֆինանսավորումը քննադատող Մովսիսյանի հրաժարականից հետո ԲԿԳԿ նախագահի նոր տեղակալ է նշանակվել

ՀՀ կրթության, գիտության, մշակույթի և սպորտի նախարար Ժաննա Անդրեասյանը Բարձրագույն կրթության և գիտության կոմիտեի աշխատակազմին է ներկայացրել նախագահի նորանշանակ տեղակալ Լիլիթ Մկրտչյանին։ Նախարարը շնորհակալություն է հայտնել նախկին տեղակալներ Արթուր Մովսիսյանին և Մկրտիչ Այվազյանին՝ կատարած աշխատանքի համար։ Նշանակումը տեղի է ունեցել այն բանից հետո, երբ Մովսիսյանը սեփական դիմումի համաձայն հեռացել է պաշտոնից՝ քննադատելով գիտության ոլորտում խոստացված ֆինանսավորման չհատկացումը և ծրագրերի թերի իրականացումը։

ԿԳՄՍ նախարարության հաղորդագրությունը՝ ստորև․

«ՀՀ կրթության, գիտության, մշակույթի և սպորտի նախարար Ժաննա Անդրեասյանը Բարձրագույն կրթության և գիտության կոմիտեի աշխատակազմին է ներկայացրել ԲԿԳԿ նախագահի նորանշանակ տեղակալ Լիլիթ Մկրտչյանին։

Նախարարը շնորհակալություն է հայտնել ԿԳՄՍ բարձրագույն կրթության և գիտության կոմիտեի նախագահի նախկին տեղակալներ Արտուր Մովսիսյանին և Մկրտիչ Այվազյանին՝ կատարած երկարատև բարեխիղճ աշխատանքի և բարձրագույն կրթության և գիտության բարեփոխումների գործընթացում զգալի ներդրման համար:

Ներկայացնելով ԲԿԳԿ նախագահի նոր տեղակալին՝ Ժաննա Անդրեասյանը կարևորել է կրթության, այդ թվում՝ բարձրագույն կրթության կազմակերպման ոլորտում Լիլիթ Մկրտչյանի փորձն ու հմտությունները՝ նրան մաղթելով բեղմնավոր աշխատանք։

ԿԳՄՍ նախարարն անդրադարձել է կոմիտեի համակարգման ոլորտներում նախատեսվող աշխատանքներին և առաջիկա անելիքներին՝ ընդգծելով «Բարձրագույն կրթության և գիտության մասին» նոր օրենքի կիրարկման համար անհրաժեշտ ենթաօրենսդրական իրավական ակտերի մշակումը։ Նա առանձնակի կարևորել է նաև գիտական դրամաշնորհային ծրագրերի արդյունքների ամփոփումը և խոշոր գիտասարքերի ձեռքբերմանն ուղղված միջոցառումների ընթացքի ապահովումը, «Ակադեմիական քաղաք» ծրագրի իրականացմանն ուղղված աշխատանքները և մի շարք այլ ուղղություններ»։

Այսօր ավելի վաղ տեղեկացրել էինք, որ ՀՀ բարձրագույն կրթության և գիտության կոմիտեի նախագահի տեղակալ Արթուր Մովսիսյանը հայտարարել է, որ սեփական դիմումի համաձայն ազատվել է պաշտոնից։