Եթե էժան ցեմենտ ներկրվի երկիր, տեղական արտադրողը ծավալները կպակասեցնի և տեղականը չի կարողանա մրցել գնային առումով․ կարծիքներ

Ազգային ժողովում այսօր առաջին ընթերցմամբ ընդունվեց «Պետական տուրքի մասին» օրենքում լրացում կատարելու մասին օրենքի նախագիծը, ինչը դժվարին խնդիրների առաջ է կանգնեցնելու տեղական ցեմենտ արտադրողներին։

Նշենք, որ այս նախագծով առաջարկվում է 22 հազար դրամ պետական տուրք սահմանել Իրանից Հայաստան ներկրվող ցեմենտի համար, սակայն պետտուրք չի սահմանվում ցեմենտի խտանյութի՝ կլինկերի վրա, ինչի հետևանքով կմեծանա ներկրվող էժան խտանյութի ծավալը։ Ցեմենտ արտադրողները հայտարարում են, որ այս օրենսդրական փոփոխության արդյունքում կկրճատվեն ցեմենտի գործարաններում աշխատատեղերի քանակը։

«Հրազդան  ցեմենտ» փակ բաժնետիրական ընկերության 16 տարվա նախկին տնօրեն Նաիրա Մարտիրոսյանն այսօր հրավիրված մամուլի ասուլիսի ժամանակ նշեց, որ  մինչ 2015  թիվը հայաստանյան շուկայում ցեմենտը միակ արտադրանքն էր, որը չէր ներմուծում դրսից և դա հնարավորություն է տվել Արարատի և Հրազդանի ցեմենտի  գործարաններին աշխատել  նորմալ ծավալներով և ապահովել  հայաստանյան շուկայի պահանջարկը:

Ըստ Մարտիրոսյանի՝ վերջին շրջանում հայաստանյան շուկա է ներկրվում իրանական ցեմենտ, որի որակից ինքը զարմացած է․

«Որակի սերտիֆիկատներ չկան, և այսօր  ինչ-որ եզրակացություն անել իրանական ցեմենտի մասին, բավականին դժվար է: «Արարատ ցեմենտի» աշխատակիցների դժգոհությունները պարզ են՝ եթե էժան ցեմենտ ներկրվի երկիր, տեղական արտադրողը ծավալները կպակասեցնի և տեղականը չի կարողանա մրցել գնային առումով»,- ասաց նա։

Ասուլիսին ներկա Հայրենական ապրանք արտադրողների միության նախագահ Վազգեն Սաֆարյանը ևս կիսում է մտահոգությունը, որ իրանական էժան ցեմենտը կարող է մրցակցությունից դուրս մղել տեղական արտադրանքը։

«Կառավարությունը պետք է քայլեր կատարի էլեկտրաէներգիայի և գազի սակագները տեղական արտադրությամբ զբաղվող այդ գործարանների համար իջեցնելու ուղղությամբ, որը հետո ետ կստանա տվյալ գործարանների շահութաբերության տեսքով։ 2 ցեմենտի գործարան ունենալով, մեզ մոտ տարակուսանք է առաջացնում  այն, որ ուրիշ երկրի ցեմենտ արտադրողը բերի և էստեղը զբաղեցնի շուկան»,-ասաց  Սաֆարյանը։