15.12.2025 | 12:22
Մահացել է կոմպոզիտոր Լևոն Օգանեզովը
Փորձագետը ներկայացնում է դպրոցները վերանորոգելու «կոնկրետ փողի» տեղը. ՏԵՍԱՆՅՈՒԹ
Հասարակություն
02.04.2019 | 15:42
Կրթության փորձագետ Սերոբ Խաչատրյանը գյուղական դպրոցներում առկա բազմաթիվ խնդիրներ է մատնանշում: «Կրթական խնդիրները նոր Հայաստանի հին գյուղերում» խորագրով քննարկման ժամանակ նա առանձնացրեց համակարգիչների, 12-ամյա կրթական համակարգի, ֆինանսների բացակայության և այլ խնդիրներ:
«Վերջին 10 տարվա ընթացքում Հայաստանի դպրոցները շատ քիչ համակարգիչներ են ստացել: 2000-ական թվականներին համակարգիչների մեծ հոսք եղավ դպրոցներ, բայց բոլորս էլ գիտենք, որ համակարգիչը պետք է պարբերաբար թարմացնել: Այսօր մենք ունենք գյուղական դպրոցներ, որն ունի 2-3 համակարգիչ՝ 2007-08 թվականների արտադրության, մեկը՝ տնօրենի սենյակում է, որովհետև նա պետք է հաշվետվություններ ներկայացնի, մի երկուսը կիսատ-պռատ, հին օպերացիոն համակարգերով են աշխատում: Իսկ մարզպետարանից զանգահարում են, ասում՝ յուրաքանչյուր առարկայից պետք է ամիսը մեկ անգամ տեղեկատվական տեխնոլոգիաների օգտագործմամբ դաս անեք: Այդպիսի կետ ունենք իրավական: Բայց ինչպես անեն, ինչով անեն, շատ լուրջ խնդիր է: Կան նաև գույքային խնդիրներ: Լաբորատորիաների մասին էլ ընդհանրապես չեմ խոսում»,- ասաց Սերոբ Խաչատրյանը:
Ինչ վերաբերում է ոլորտում խնդիրների լուծման համար ֆինանսական միջոցներին, կրթության փորձագետը «կոնկրետ փողի տեղ ցույց տվեց»:
«Դրանցից մեկը 12-ամյա պարտադիր կրթության մեջ է: Բոլորս էլ գիտենք, որ ավագ դասարաններում երեխաները ո՛չ սովորում են, ո՛չ էլ նորմալ դասի են գնում, որովհետև եթե 9 տարում երեխան բան չի սովորել, ինչ հրաշք պիտի լինի, որ 10-րդ դասարանում միանգամից պայծառանա ու սկսի սովորել: Ձևական գնում-գալիս է»,- ասաց Սերոբ Խաչատրյանը՝ հավելելով, որ նման 15 հազար աշակերտ կա:
«Այսինքն՝ եթե 15 հազար հոգին բազմապատկեք 250 դոլարով, ստացվում է 3.5 մլն դոլար: Ահա փող, որ կարելի է ծախսել դպրոցների շինարարության կամ վիճակի բարելավման վրա: Եթե վստահ լինեմ, որ այդ երեխաները սովորում են, ես կասեմ՝ մի ափսոսացեք, բայց գիտեմ, որ այդ երեխաներն աշխատում են՝ սկսած գերեզմանափորից՝ բառի ուղիղ իմաստով, վերջացրած լցակայաններ, գյուղատնտեսական աշխատանքներ և այլն: Ինչի՞ համար ենք մենք այս երեխաների կրթությունը ֆինանսավորում, եթե դա իրենց պետք չի»,- հավելեց փորձագետը:
Մանրամասները՝ տեսանյութում:
Ռոբերտ Անանյան
