13.01.2026 | 23:28
ՆԳՆ շրջիկ սպասարկման գրասենյակները ծառայություններ կմատուցեն Գեղարքունիքի և Վայոց ձորի մարզերում
Թուրքիայի հետախուզության ղեկավարն ու գլխավոր ընդդիմադիր կուսակցությունը հանդիպում են անցկացրել անվտանգության հարցերի շուրջ
Քաղաքականություն
23.11.2024 | 16:35
Թուրքիայի գլխավոր ընդդիմադիր Ժողովրդահանրապետական կուսակցության՝ CHP-ի նախագահ Օզգուր Օզելը մանրամասներ է հայտնել երկրի հետախուզական ծառայության ղեկավար Իբրահիմ Քալընի՝ CHP-ի կենտրոնակայան կատարած վերջին այցի մասին՝ այդ հանդիպումը համարելով «պատմական» հանգրվան ընդդիմություն-իշխանություն հարաբերություններում, գրում է Turkiye today-ը։
Այս համագործակցությունն ընդգծում է Թուրքիայի գլխավոր ընդդիմադիր կուսակցության և նրա ազգային հետախուզական գործակալության ընդհանուր մտահոգությունները Անկարայի կողմից ահաբեկչական հռչակված կազմակերպությունների, այդ թվում՝ FETO-ի, PKK-ի և «Իսլամական պետության» ներթափանցումը կանխելու վերաբերյալ:
«Թուրքական հետախուզությունը ճեպազրույցներ է ներկայացրել PKK-ի, FETO-ի և «Իսլամական պետության», ինչպես նաև վերջինի հետ կապված այլ ծայրահեղականների վերաբերյալ: Փորձագետները խոսել են այս հարցերի շուրջ, իսկ Քալընը ներկայացրել է հիմնական կետերը: Մենք 15 հարց ենք տվել։ Դրանցից 9-ին ուղղակիորեն պատասխանել են, իսկ մնացած 6-ը լրացուցիչ պարզաբանումներ են պահանջում»,- ասել է Օզելը՝ հավելելով․
«Մենք հետախուզական աջակցություն խնդրեցինք՝ ապահովելու համար, որ FETO-ն կամ այլ ահաբեկչական խմբավորումները չներթափանցեն CHP: Թուրքիայի հետախուզությունը համաձայնել է աջակցել»։
Հանդիպումը պլանավորվել է թուրքական հետախուզության հետ համաձայնեցված և անցկացվել է խիստ անվտանգության պայմաններում: Օզելը հրաժարվել է նշել ներկաների անունները, բացի կուսակցության գլխավոր քարտուղար Սելին Սայեկ Բոկեից:
Նա նաև հաստատել է, որ Անկարայի քաղաքապետ Մանսուր Յավաշին թուրքական հետախուզության կողմից հսկողության մասին մեղադրանքները հանդիպման ընթացքում չեն քննարկվել։
Թարգմանությունը՝ Էմմա Չոբանյանի
